İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 455 Hüküm no: 455 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola ile Katrine, Kiryakola ve Zoviçe’nin bakkal dükkânı gedik hisselerini Bakkal Kostandi’ye sattıkları Bakkāl Eğrikapı’da Âsitâne-i aliyye’de vâki‘ bakkāl tâifesinden olup kendi nefsinden asıl ve Vilâyet-i Rumeli’de Yenişehir-i Fener kazâsına muzâfe Ağrafe nâhiyesine tâbi‘ Vineni karyesinde mütemekkineler Katrine ve Kiryakola bintey Dimo v. Polihron nâm Nasrâniyeler taraflarından husûs-ı âti’l-beyânda vekîlleri olduğu şahıslarını bilir Bakkāl Kostandi v. Nikola ve Vangeli v. Yorgi nâm zimmîler şehâdetleriyle sâbit olan Bakkāl Nikola v. Kostandi nâm zimmî mahrûse-i Galata’ya muzâfe İstinye nâhiyesine tâbi‘ Baltalimanı’nda mütemekkine Zoviçe bt. Yani nâm Nasrâniyenin sadrî kebîr oğlu ve tarafından kezâlik husûs-ı âti’l-beyânda vekîl olduğu şahs-ı mersûmeyi bilir Bakkāl Yorgi v. Yani ve Nikola v. Yani nâm zimmîler şehâdetleriyle sâbit olan Bakkāl Tanaş v. Tanaş nâm zimmî hâzır olduğu hâlde meclis-i şer‘-i hatîrde tâife-i mersûmeden işbu bâ‘isiyyü’s-sifr Kostandi v. Yani ve Yorgi v. Praşkova nâm zimmîler muvâcehelerinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Eğrikapı dâhilinde Avcıbey mahallesinde kâin İvaz Efendi dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi benim ve yirmi ikişer buçuk sehmden kırk beş sehmi müvekkilelerim mersûmetân Katrine ve Kiryakola Nasrâniyelerin ve kırk beş sehmi dahi hâzır-ı vekîl-i mersûmun anası ve müvekkilesi mersûme Zoviçe Nasrâniyenin akd-i âti’z-zikrin sudûruna değin benimle müvekkilât-ı mesfûrâtın yedimizde şâyi‘an mülkümüz olmağla gedik-i mezkûrdan ben ve müvekkilelerim mersûmetânın ber-minvâl-i muharrer mâlikeler olduklarımız cem‘an yetmiş beş sehm hisselerimizi yedi yüz guruşa ve hâzır-ı vekîl-i mersûm anası ve müvekkilesi mersûme Zoviçe Nasrâniyenin kezâlik mâlike olduğu kırk beş sehm hissesini beş yüz guruşa tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûmân Kostandi ve Yorgi zimmîlere ale’l-iştirâk her birimiz bi’l-asâle bi’l-vekâle bey‘ ü temlîk ve teslîm eylediğimizde onlar dahi ber-vech-i muharrer iştirâken iştirâ ve temellük ve tesellüm ve kabz ve kabûl ve semenleri olan cem‘an bin iki yüz guruşu bize tamâmen def‘ ü teslîm ve biz dahi yedlerinden bi’l-asâle ve bi’l-vekâle tamâmen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrda benim ve müvekkilelerim mersûmetân Katrine ve Kiryakola Nasrâniyelerin ve hâzır-ı vekîli mersûm Tanaş zimmî dahi anam ve müvekkilem mersûme Zoviçe Nasrâniyenin aslâ ve kat‘â alâka ve medhallerimiz kalmayıp mersûmân Kostandi ve Yorgi zimmîlerin iştirâken mülk-i müşterâları ve hakk-ı sırfları olmuşdur dedikde gıbbe’t-tasâduki[‘ş-şer‘î mâ-vaka‘a bi’t-taleb ketb olundu] Fî 15 Rebî‘ülevvel sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Ustabaşı Nikola, Ustabaşı Kostandi, Yazıcı Yani v. Dimo.