İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 456 Hüküm no: 456 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kostandi ile kardeşi Harizma’nın bakkal dükkânı gediğindeki hisselerini Bakkal Yuvakim’e sattıkları Vezneciler’de bakkāl Vilâyet-i Anadolu’da Kayseriye kazâsına tâbi‘ İncesu kasabasında mütemekkin Harizma v. el-hâlik Anaştaş nâm sagīrin tesviye-i umûruna bâ-hüccet-i şer‘iyye vasiyy-i mansûbu bakkāl esnâfı ustabaşılarından Kiryako v. Vasil nâm zimmî sagīr-i mersûmun li-ebeveyn er karındaşı Bakkāl Kostandi nâm zimmî hâzır olduğu hâlde meclis-i şer‘-i hatîrde bakkāl tâifesinden işbu bâ‘isü’s-sifr Yuvakim v. Lefter nâm zimmî muvâcehesinde bi’l-vesâye ikrâr-ı tâm ve takrîr-i kelâm edip İstanbul’da Vezneciler sûku nezdinde köşebaşında kâin Halil Paşa dükkânı denmekle şehîr bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuzar sehmden doksan sehmi işbu hâzırûn bi’l-meclis Bakkāl Yakof ve Vasil ve Yorgi zimmîlerin şirâen ve on beş sehmi vasîsi olduğum sagīr-i mersûm Harizma’nın ve on beş sehmi karındaşı hâzır-ı mersûm Kostandi zimmînin babaları hâlik-i mersûmdan irsen akd-i âti’z-zikrin sudûruna değin yedlerinde mülkleri olmağla ben âlât-ı gedik-i mezkûrdan sagīr-i mersûmun on beş sehm hisse-i mezkûresini beyne’t-tâlibîn lede’l-müzâyede ve gıbbe inkıtâ‘i’r-rağbe karâr-dâdesi olan iki bin sekiz yüz yetmiş beş guruşa tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkleri hâzırûn-ı mesfûrûnun icâzetleriyle bi’l-vesâye ve hâzır-ı mersûm Kostandi zimmî dahi kezâlik iki bin sekiz yüz yetmiş beş guruşa bi’l-asâle mersûm Yuvakim zimmîye bey‘ ü temlîk ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semenleri olan cem‘an beş bin yedi yüz elli guruşu mâlından bize tamâmen def‘ ü teslîm ve biz dahi yedinden asâleten ve vesâyeten ahz u kabz etmemizle fîmâ-ba‘d âlât-ı gedik-i mezkûrun otuz sehm hisse-i mezkûresinde vasîsi olduğum sagīr-i mersûm Harizma zimmî ile hâzır-ı mesfûr Kostandi zimmînin aslâ ve kat‘â alâka ve medhalleri kalmayıp mersûm Yuvakim zimmînin mülk-i müşterâsı ve hakk-ı sırfı olmuşdur dedikde mukırr-ı vasiyy-i mersûm Kiryako zimmînin bi’l-cümle takrîr-i meşrûhunu hâzır-ı mersûm Kostandi ve mesfûr Yuvakim zimmîden her biri bi’l-muvâcehe ve bi’l-müşâfehe tahkīk ve tasdîk etmeğin mâ-vaka‘a [bi’t-taleb ketb olundu] Fî 7 Ra sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak, Ustabaşı Kiryako, Yazıcı Hıristo [v.] Kozma, Kabzımâl Yani