İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 457 Hüküm no: 457 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Magdola Nasraniyenin bakkal gediği hissesini Bakkal Eftat’a sattığı Bakkāl Şehzâdebaşı’nda Kaydı ihrâc-şüd fî 17 S sene [12]74 Vilâyet-i Anadolu’da Niğde sancağında vâki‘ İncesu kasabasında Salande? mahallesinde mütemekkine Magdola bt. Ligori v. Kiryako nâm Nasrâniyenin li-ebeveyn ammi ve tarafından husûs-ı âti’l-beyânda vekîl olduğu şahs-ı mersûmeyi bilir bakkāl ustabaşılarından Mai v. Anaştaş ve Sava v. diğer Anaştaş nâm zimmîler şehâdetleriyle sâbit olan Yakof v. Yuvan nâm zimmî meclis-i şer‘-i hatîrde bakkāl tâifesinden Eftat v. Filibos nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul’da Şehzâdebaşı’nda kâin Yahya Bey dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi sekiz sehmi mersûm Eftat zimmînin babası mesfûr Filibos zimmînin ve altmış sehmi İstefan zimmînin ve mâ‘adâ otuz iki sehmi dahi akd-i âti’z-zikrin sudûruna değin müvekkilem mersûmenin yedlerinde mülkleri olmağla ben gedik-i mezkûrdan müvekkilem mersûmenin ber-minvâl-i muharrer mâlik olduğu otuz iki sehm hisse-i şâyi‘asını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Eftat zimmîye dört bin guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dört bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile bi’l-asâle ve bi’l-vekâle ibrâ ve iskāt eyledik fîmâ-ba‘d âlât-ı gedik-i mezkûrun otuz iki sehm hisse-i şâyi‘asında müvekkilem mersûmenin aslâ ve kat‘â alâka ve medhali kalmayıp müşteri-i mersûm Eftat zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-gurreti Zilhicce sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı Kiryako, Ustabaşı Ananosti, Ustabaşı İstefan, Kabzımâl Yani.