İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 458 Hüküm no: 458 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani’nin bakkal gediği hissesini Bakkal Hıristo ve Yani’ye sattığı Şehremini kurbünde bakkāl Âsitâne-i aliyye’de vâki‘ bakkāl tâifesinden Yani v. Tanaş nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Hıristo ve Yorgi veledey Yani v. Yorgi nâm zimmîler taraflarından husûs-ı âti’l-beyânda tasdîka vekîlleri Ustabaşı Anonosti v. Hıristo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Şehremini kurbünde kâin İsmail Efendi dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen sehmi müvekkilân-ı mersûmân Hıristo ve Yorgi zimmîlerin ve on sehmi Kiryako v. Kosta zimmînin ve bâkī otuz sehmi dahi akd-i âti’z-zikrin sudûruna değin benim bâ-hüccet yedimizde şâyi‘an mülklerimiz olmağla gedik-i mezkûrdan ben ber-minvâl-i muharrer mâlik olduğum otuz sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkilân-ı mersûmâna bin beş yüz guruşa ale’l-iştirâki’s-seviyy bey‘ ü temlîk ve lâyıkı vechile teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl ve semen-i mezkûr bin beş yüz guruşu bana tamâmen def‘ ü teslîm ve ben dahi yedlerinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm hisse-i gedik-i mezkûrda benim aslâ ve kat‘â alâka ve medhalim kalmayıp müşteriyân-ı müvekkilân-ı mersûmân Hıristo ve Yorgi zimmînin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 15 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.