İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 458 Hüküm no: 459 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Ustabaşısı Fenerli Ananosti’nin bakkal dükkânı gediğinde altmış beş sehm hissesi olduğunu ispat etmesiyle kendisine hüccet verilmesi Bakkāl ihbârı Âsitâne-i aliyye’de vâki‘ bakkāl tâifesinin ustabaşılarından Fenerli Ananosti v. Hıristo nâm zimmî meclis-i şer‘-i hatîrde takrîr-i kelâm ve bast ani’l-merâm edip mahmiye-i mezbûre hısnı ebvâbından Cibâli Kapısı hâricinde kâin Halil Ağa dükkânı denmekle arîf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla elli beş sehmi gāib ani’l-meclis Yorgi zimmînin ve bâkī altmış beş sehmi benim yedimizde şâyi‘an mülk-i müşterâmız olmağla gedik-i mezkûrun hisse-i şâyi‘ası’çün yedimde hüccet olmamağla esnâf-ı mezkûreden husûs-ı merkūma vukūf ve ıttılâ‘ları olan kimesnelerden istihbâr olunup yedime kıbel-i şer‘den bir kıt‘a hüccet i‘tâsı niyâzımdır dedikde fi’l-hakīka gedik-i mezkûrun altmış beş sehm hisse-i şâyi‘ası mersûm Ananosti zimmînin yedinde şirâen mülkü olduğunu esnâf-ı mezkûreden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka ketb ü imlâ olundu. Fî 1 Rebî‘ülevvel sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Nikoli v. Yani, Ustabaşı Kostandi v. İspiro, Çâryekbaşı Kostandi v. Nikola, Kabzımâl Yani v. Dimo, Yazıcı Hıristo v. Todori.