İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 459 Hüküm no: 460 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgaki’nin bakkal gediği hissesini oğulları Bakkal Dimitri ve Zahari’ye sattığı Bakkāl Arslan Ağa dükkânı Âsitâne-i aliyye’de vâki‘ bakkāl tâifesinden Yorgaki v. Hıristo nâm zimmî meclis-i şer‘-i hatîrde tâife-i mersûmeden olup mersûm Yorgaki zimmînin sulbî kebîr oğulları işbu hâmileyü’r-rakīm Dimitri ve Zahari nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Davud Paşa Câmi‘-i şerîfi nezdinde Çiftefırınlar’da kâin Arslan Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla beş sehmi işbu hâzır bi’l-meclis Bakkāl Kostandi v. Esteryo zimmînin ve on sehmi oğullarım mersûmânın ve bâkī yüz beş sehmi dahi akd-i âti’z-zikrin sudûruna değin benim bâ-hüccet yedimizde şâyi‘an mülkümüz olmağla gedik-i mezkûrdan ben ber-vech-i muharrer mâlik olduğum yüz beş sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğullarım mesfûrâna bin beş yüz guruşa ale’l-iştirâki’s-seviyy bey‘ ü temlîk ve lâyıkı vechile teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin beş yüz guruşu oğullarım mersûmân bana tamâmen def‘ ü teslîm ve ben dahi yedlerinden tamâmen ve kâmilen ahz u kabz eyledim fîmâ-ba‘d hisse-i mezkûrda benim aslâ ve kat‘â alâka ve medhalim kalmayıp oğullarım müşteriyân-ı mersûmânın mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Rebî‘ülâhir sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı Ananosti, Ustabaşı İsak, Yazıcı Dimitri, Ustabaşı Kiryako.