İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 460 Hüküm no: 461 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yuvakim’in bakkal gediğindeki altmış hissesini Anaştaş ve Bratamos’a sattığı Bakkāl Küçükpazar’da Âsitâne-i aliyye’de vâki‘ bakkāl tâifesinden Yuvakim v. Mihal nâm zimmî meclis-i şer‘-i hatîrde tâife-i mersûmeden işbu bâ‘iseyü’s-sifr Anaştaş v. İspir[o] ve Bratamos v. Yuvan nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Küçükpazar kurbünde karakolhâne karşısında kâin Davud Ağa dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Sava zimmînin ve mâ‘adâ altmış sehmi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim mersûm Sava zimmînin izniyle mersûmân Anaştaş ve Bratamos zimmîlere üç bin guruşa ale’l-iştirâki’s-seviyy bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç bin guruşu müşteriyân-ı mersûmân bana tamâmen def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d gedik-i mezkûrda olan altmış sehm hisse-i şâyi‘amda benim aslâ ve kat‘â alâka ve medhalim kalmayıp müşteriyân-ı mersûmân Anaştaş ve Bratamos zimmîlerin iştirâken mülk-i müşterâları ve hakk-ı sırfları olmuşur dedikde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fî 21 Z sene 1247 Şuhûdü’l-hâl: Eş-şâhidûnü’s-sâbikūn.