İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 460 Hüküm no: 462 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vangelice, Efendo, Katrine ve Antice’nin bakkal gediğindeki hisselerini Dimitri, Zahari ve Yorgi’ye sattıkları Karagümrük’de bakkāl Vilâyet-i Rumeli’de Yenişehir-i Fener nevâhîsinden Ağrafe nâhiyesine tâbi‘ Forona karyesinde mütemekkineler Vangelice ve Efendo ve Katrine ve Antice benât-ı Yani v. Polihron ve Marya bt. Hıristo v. Atam nâm Nasrâniyeler taraflarından husûs-ı âti’l-beyânda vekîlleri olduğu şahıslarını bilir Kostandi v. Yorgi ve Yani v. diğer Yani nâm zimmîler şehâdetleriyle sâbit olan başka Kostandi v. Esteryo nâm zimmî meclis-i şer‘-i hatîrde bakkāl tâifesinden işbu hâmilü’r-rakīm Dimitri ve Zahari veledey Yorgi ve diğer Yorgi v. Yani nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip İstanbul’da Karagümrüğü kurbünde Keçeci Piri mahallesinde kâin Taşçı Hasan dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi beşer buçuk sehmden yüz iki sehmi müvekkilelerim mersûmâtdan mesfûrât Vangelice ve Efendo ve Katrine ve Antice Nasrâniyelerin ve on sekiz sehmi mersûme Marya Nasrâniyenin yedlerinde akd-i âti’z-zikrin sudûruna değin mülkleri olmağla ben müvekkilelerim mersûmâtın ber-minvâl-i meşrûh şâyi‘an mâlikeler oldukları gedik-i mezkûrun otuz sehmini mersûmûndan mesfûr Dimitri zimmîye ve otuz sehmini karındaşı mersûm Zahari zimmîye ve altmış sehmini mesfûr diğer Yorgi zimmîye tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bin yedi yüz guruşa bi’l-vekâle bey‘ ü temlîk ve her birine lâyıkı vechile teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr bin yedi yüz guruşu mâllarından bana def‘ ü teslîm eylediklerinde ben dahi yedlerinden bi’l-vekâle tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrda müvekkillelerim mersûmâtın aslâ ve kat‘â alâka ve medhalleri kalmayıp mersûmûnun ber-minvâl-i meşrûh mülk-i müşterâları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.