İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 461 Hüküm no: 463 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi’nin bakkal dükkânı gediğindeki hissesini Zahari’ye sattığı Gümrükönü’nde bakkāl Vilâyet-i Rumeli’de İnebahtı sancağında vâki‘ Kerpiniş kazâsına tâbi‘ Miryara karyesinde mütemekkin Kostandi v. Yani v. Niko nâm zimmî tarafından husûs-ı âti’l-beyânda vekîl olduğu Bakkāl Dimitri v. Yorgi ve Bakkāl Yani v. Dimo nâm zimmîler şehâdetleriyle sâbit olan Ustabaşı Ananosti v. Hıristo nâm zimmî meclis-i şer‘-i hatîrde yağcı bakkāl ustabaşısı işbu hâmilü’r-rakīm Zahari v. Yorgi nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul hısnı ebvâbından Bahçekapısı hâricinde Gümrük-i Kebîr karşısında kâin Hazîne Kethüdâsı dükkânı denmekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla elli iki sehmi mersûm Zahari zimmînin babası mesfûr Yorgaki zimmînin ve yirmi dört sehmi Marya Nasrâniyenin ve yirmi dört sehmi diğer Kostandi zimmînin ve on iki sehmi başka Marya Nasrâniyenin ve sekiz sehmi dahi müvekkilim mersûmun olmağla akd-i âti’z-zikrin sudûruna değin müvekkilim mersûmun ber-minvâl-i muharrer mâlik olduğu sekiz sehm hisse-i şâyi‘asını ben tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Zahari zimmîye sekiz yüz guruşa bi’l-vekâle bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr sekiz yüz guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrun hisse-i şâyi‘a-i mezkûresinde müvekkilim mersûmun aslâ ve kat‘â alâka ve medhali kalmayıp müşteri-i mersûm Zahari zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 23 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.