İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 462 Hüküm no: 464 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esteryo ve Yorgi kardeşlerin iki bakkal dükkânı gediklerindeki hisselerini Dimitri ve Yorgaki’ye sattıkları Bakkāl Kadırga limanı’nda Ali Ağa dükkânı ve Hacı İbrahim dükkânı Vilâyet-i Rumeli’de Yenişehir-i Fener kazâsına muzâfe Kalos nâhiyesine tâbi‘ Portarya karyesinde mütemekkinler Esteryo ve Yorgi veledey Yani v. Ergiri nâm zimmîler taraflarından husûs-ı âti’l-beyânda vekîlleri olduğu Bakkāl Dimitri v. Yorgaki ve Bakkāl Yani v. Dimitri nâm zimmîler şehâdetleriyle sâbit olan Ustabaşı Ananosti v. Hıristo nâm zimmî meclis-i şer‘-i hatîrde bakkāl tâifesinden işbu bâ‘iseyü’s-sifr Yorgi ve Kosta v. Hıristo nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Kadırga limanı nezdinde Payzen hanı tahtında kâin Hacı İbrahim dükkânı denmekle arîf açık bir bâb ve kurbünde kâin Ali Ağa dükkânı denmekle ma‘rûf mesdûd bir bâb ki cem‘an iki bâb bakkāl dükkânı derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla kırkar sehmi Bakkāl Kosta zimmînin ve yetmiş altışar sehmi mersûmân Yorgi ve Kosta zimmîlerin ve bâkī dörder sehmi dahi akd-i âti’z-zikrin sudûruna değin müvekkillerim mersûmânın bâ-hüccet-i şer‘iyye yedlerinde mülkleri olmağla gedik-i mezkûrlardan müvekkillerim mersûmânın ber-vech-i muharrer mâlikler oldukları dörder sehm hisse-i şâyi‘alarını ben tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Yorgi ve Kosta zimmîlere üç yüz guruşa ale’l-iştirâk bey‘ ü temlîk ve lâyıkı vechile teslîm eylediğimde onlar dahi ber-vech-i meşrûh iştirâken iştirâ ve temellük ve tesellüm ve kabz ve kabûl ve semeni olan meblağ-ı mezkûr üç yüz guruşu müşteriyân-ı mersûmân bana def‘ ü teslîm ve ben dahi yedlerinden bi’l-vekâle ahz u kabz etmemle mebî‘-i mezkûrların tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrların hisse-i şâyi‘alarında müvekkillerim mersûmânın aslâ ve kat‘â alâka ve medhalleri kalmayıp mersûmân Yorgi ve Kosta zimmîlerin mülk-i müşterâları ve hakk-ı sırfları olmuşdur dedikde gıbbe’t-tasâduki[‘ş-şer‘î mâ-vaka‘a bi’t-taleb ketb olundu] Fî 9 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.