İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 464 Hüküm no: 466 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani’nin iki adet bakkal dükkânı gediklerindeki hissesini kardeşi Kostandi’ye sattığı Bakkāl Arslan Ağa ve Kasabbaşı dükkânları Vilâyet-i Rumeli’de Yenişehir-i Fener kazâsı nevâhîsinden Ağrafe nâhiyesine tâbi‘ Forona karyesinde mütemekkin iken bundan akdem hâlike olan Efendo bt. Hıristo nâm Nasrâniyenin hasran vârisleri sulbî kebîr oğulları bakkāl tâifesinden Yani ve Kostandi veledey Esteryo nâm zimmîlerden mersûm Yani zimmî tarafından husûs-ı âti’l-beyânda vekîli olduğu Bakkāl Zahari v. Yorgaki ve Bakkāl Yorgi v. Hıristo nâm zimmîler şehâdetleriyle sâbit olan Bakkāl Dimitri v. Yorgaki nâm zimmî meclis-i şer‘-i hatîrde işbu hâmilü’r-rakīm mesfûr Kostandi zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Davud Paşa Câmi‘-i şerîfi civârında Çiftefırınlar’da kâin Arslan Ağa dükkânı denmekle arîf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz on beş sehmi benimle karındaşım Zahari zimmînin ve bâkī beş sehmi ile mahmiye-i mezbûrede Langa-i Sagīr kurbünde Akarçeşme karşısında kâin Kasabbaşı dükkânı denmekle ma‘rûf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin kezâlik yüz yirmi sehm [86b] i‘tibârıyla yüz yedi sehmi yine benimle karındaşım Zahari zimmînin ve mâ‘adâ on üç sehmi ki cem‘an on sekiz sehmi müvekkilim mersûm ile karındaşı mesfûr Kostandi zimmînin anaları hâlike-i mersûmenin sağlığında yedinde mülkü olup ba‘de helâkihi müvekkilim mersûm ile mesfûr Kostandi zimmîye ale’l-iştirâki’s-seviyy mevrûs olmağın gedik-i mezkûrlardan müvekkilim mersûmun irsen ber-vech-i muharrer mâlik olduğu dokuz sehm hissesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşı mersûm Kostandi zimmîye üç yüz elli guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ve semen-i mezkûr üç yüz elli guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d hisse-i mezkûrelerde müvekkilim mersûmun aslâ ve kat‘â alâka ve medhali kalmayıp iki bâb dükkândan on sekiz sehmi mersûm Kostandi zimmînin irsen ve şirâen mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Rebî‘ülâhir sene 1247 Şuhûdü’l-hâl: Eş-şâhidûnü’s-sâbikūn.