İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 465 Hüküm no: 467 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uğuriçe, Kiryakola, Gorfo ve Marya’nın bakkal gediğindeki hisselerini Bakkal Dimitri’ye sattıkları Bakkāl Topkapı’da Vilâyet-i Rumeli’de Yenişehir-i Fener kazâsı muzâfe Ağrafe nâhiyesine tâbi‘ Hırso karyesinde mütemekkineler Uğuriçe ve Kiryakola ve Gorfo ve Marya benât-ı Kosta v. Polihron nâm Nasrâniyeler taraflarından husûs-ı âti’l-beyânda vekîlleri olduğu eşhâs-ı mersûmâtı bilir Bakkāl Dimitri v. Yorgaki ve Kosta v. Hıristo nâm zimmîler şehâdetleriyle sâbit olan Bakkāl Kostandi v. Esteryo nâm zimmî meclis-i şer‘-i hatîrde Âsitâne-i aliyye’de vâki‘ bakkāl tâifesinden işbu bâ‘isü’r-rakīm Dimitri v. Yorgi nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Topkapısı dâhilinde fırın karşısında kâin Hacı Mahmud dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Bakkāl Petro v. Anaştaş zimmînin ve bâkī doksan sehmi dahi akd-i âti’z-zikrin sudûruna değin müvekkil[ele]rim mesfûrâtın bâ-hüccet-i şer‘iyye yedlerinde şâyi‘an mülkleri olmağla gedik-i mezkûrdan müvekkilelerim mersûmâtın ber-vech-i muharrer mâlikeler oldukları doksan sehm hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereki izniyle mersûm Dimitri zimmîye beş bin guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ve semen-i mezkûr beş bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrun doksan sehm hisse-i şâyi‘asında müvekkilelerim mersûmâtın aslâ ve kat‘â alâka ve medhalleri kalmayıp müşteri-i mersûm Dimitri zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Ra sene 1247 Şuhûdü’l-hâl: Eş-şâhidûnü’s-sâbikūn.