İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 466 Hüküm no: 468 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uğuri ile Yasef’in bakkal gediğindeki hisselerini Bakkal İlya’ya sattıkları Bakkāl Kocamustafapaşa’da Vilâyet-i Rumeli’de Yenişehir-i Fener kazâsı muzâfe Ağrafe nâhiyesine tâbi‘ Ayatarpalye? karyesinde mütemekkinler Uğuri bt. Kosta nâm Nasrâniye ile Yasef v. Polihron nâm zimmî taraflarından husûs-ı âti’l-beyânda vekîlleri olduğu mersûme Uğuri Nasrâniyenin şahsını bilir Bakkāl Dimitri v. Nikola ve Bakkāl Dimitri v. Yani nâm zimmîler şehâdetleriyle sâbit olan Ustabaşı Ananosti v. Hıristo nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr İlya v. Hıristo nâm zimmî tarafından husûs-ı âti’l-beyânda tasdîka vekîl-i şer‘îsi Yorgi v. Ananosti nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul’da Kocamustafapaşa Câmi‘-i şerîfi kapısı ittisâlinde kâin Hacı Receb dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on üç sehmi müvekkil-i mersûm İlya zimmînin ve otuz iki buçuk sehmi Sava v. Hıristo zimmînin ve yirmi yedi sehmi Yorgi v. Dimitri zimmînin ve yirmi yedi sehmi Aci Kiryako zimmînin ve on beş buçuk sehmi müvekkillerim mersûmândan mersûme Uğuri Nasrâniyenin ve beş sehmi dahi mersûm Yasef zimmînin akd-i âti’z-zikrin sudûruna değin yedlerinde mülkleri olmağla gedik-i mezkûrdan müvekkillerim mersûmânın ber-minvâl-i muharrer mâlikler oldukları cem‘an yirmi buçuk sehm hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mersûm İlya zimmîye bin guruşa bi’l-vekâle bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-vekâle ibrâ ve iskāt eyledik fîmâ-ba‘d gedik-i mezkûrun hisse-i mezkûresinde müvekkillerim mersûmânın aslâ ve kat‘â alâka ve medhalleri kalmayıp müşteri-i müvekkil-i mersûm İlya zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.