Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 441 Hüküm no: 521 Orijinal metin no: [85a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Abdülmennân’ın İstanbul gümrüğü mukátaasındaki vazifesi için Yahya Ağa b. Şaban’ı vekil tayin ettiği Mahmiye-i İstanbul’da Bâli Paşa mahallesinde sâkin olup hâlâ mahrûse-i Mısr-ı Kahire’de medîne-i Reşid’de habbâz olan Ali Ağa b. Abdülmennân b. Abdullah tarafından husûs-ı âti’l-beyâna ber vech-i âtî vekâlet iddi‘â eden Yahya Ağa b. Şaban nâm kimesne meclis-i şer‘-i şerîfde Musli Beşe b. Hasan nâm kimesne mahzarında üzerine da‘vâ ve takrîr-i kelâm edip müvekkilim mezbûr Ali Ağa İstanbul gümrüğü mukāta‘asından olmak üzre taraf-ı saltanat-ı aliyyeden kendiye ihsân olunan yevmî on beş akçe vazîfesin ahz u kabz ve vazîfe-i merkūmenin ruûs ve berâtını ve mahalle-i mezbûrede vâki‘ menzilini hıfz ve tarafından merkūm Musli Beşe’yi vekîl nasb ve ta‘yîn edip ol dahi ba‘de’l-kabûl menzil-i mezbûr ve berât-ı mesfûru zabt ve hıfz ve dokuz ayda zikr olunan gümrük emîni olanlar yedinden cem‘an üç bin sekiz yüz seksen sekiz akçesini kabz etmişidi hâlâ mezbûr Ali Ağa merkūm Musli Beşe’yi vekâletinden azl ve yedinde olan meblağ-ı mezbûr üç bin sekiz yüz seksen sekiz akçeyi kabz ve zikr olunan menzil-i mezkûr ve berât-ı mesfûru zabt ve hıfza tarafından beni vekîl ve menâbına nâib nasb edip hattâ kendi hat ve hatmini hâvî yedime vekâlet temessükü dahi vermekle merkūm Musli Beşe’ye suâl olunup meblağ-ı mezbûru ve menzil-i mezkûr ve berât-ı mesfûru bana teslîme tenbîh olunmak matlûbumdur dedikde gıbbe’s-suâl mezbûr Musli Beşe cevâbında fi’l-vâki‘ mezbûr Ali Ağa’nın ber vech-i meşrûh vazîfesinden dokuz ayda cem‘an meblağ-ı mezbûr üç bin sekiz yüz seksen sekiz akçeyi kabz [85b] ve menzil-i mezkûru ve berât-ı mesfûru zabt ve hıfz eylediğini ikrâr lâkin mezbûr Yahya Ağa’nın ber vech-i muharrer vekâletini inkâr edicek mezbûr Yahya Ağa’dan ber vech-i muharrer vekâletine beyyine taleb olundukda zikr olunan vekâlet temessükünde isimleri mastûr olan el-Hâc Mehmed b. el-Hâc Hicazî ve Fazlullah b. Şaban kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ali Ağa b. Abdülmennân b. Abdullah mezbûr Musli Beşe’nin makbûzu olup dokuz ayda müctemi‘ olan meblağ-ı mezbûru ve menzil-i mezkûru ve berât-ı mesfûru merkūm Musli Beşe ahz u kabz ve hıfza mezbûr Yahya Ağa’yı bizim huzûrumuzda vekîl ve menâbına nâib nasb ve ta‘yîn eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Mehmed, Mehmed Efendi b. ( ), el-Hâc Ağa b. Ahmed, Musa b. Mustafa , Selim Beşe b. ( ).