Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 442 Hüküm no: 522 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa b. Hacı Süleyman’ın satışı iptal edilen çiftliğindeki mal ve eşyaların iadesi Min mümzâtihî Temeşvar vâlisi oldukdan sonra maktûlen vefât eden defterdâr Hasan Paşa b. el-Hâc Süleyman’ın sulbî sagīr oğlu Mehmed Bey ve sulbiye sagīre kızı Fâtıma Hanım’ın tesviye-i umûrları için kıbel-i şer‘den mansûb vasîleri olduğu lede’ş-şer‘i’l-enver sâbit ve müte‘ayyin olan İbrahim Efendi b. Yusuf meclis-i şer‘-i şerîf-i enverde işbu bâ‘isü’l-kitâb Mehmed Bey b. Mustafa mahzarında bi’l-vesâye ikrâr ve takrîr-i kelâm edip Havâss-ı Aliyye kazâsına tâbi‘ Petinehor nâm karyede vâki‘ yine merhûm-ı mezbûra intimâ’ ile tahdîd ve tavsîfden müstağnî çiftlik ve içinde mevcûd eşyâ-i âtiye müteveffâ-yı mezbûrun mülkü ve hakkı olup ba‘de vefâtihî sagīrân-ı mezbûrânın hisse-i irsiyyelerine ta‘yîn ve ol vechile mülk ve hakları iken mârrü’z-zikr çiftliği İstanbul’da Şıkk-ı evvel defterdârı vekîli olan Mehmed Efendi müteveffâ-yı mezbûrun mîrîye olan deyni için çiftlik-i mezbûru cümle müştemilâtıyla yüz yirmi bin akçeye Mehmed Ağa b. Mehmed’e bey‘ ve kabz-ı semen edip ol dahi ba‘de’l-iştirâ mezbûr Mehmed Bey’e bin yetmiş esedî guruşa bey‘ ve teslîm ol dahi iştirâ ve teslîm-i semen eyledikden sonra çiftlik-i mezbûrun kıymeti bin beş yüz guruş olup bey‘-i gabn-i fâhiş ile olmağla kıbel-i saltanat-ı aliyyeden bey‘-i gabn-i fâhiş ile olduğu sâbit olursa semen deyû verilen meblağı geri red ve teslîm ve çiftlik-i mezbûr sagīrân-ı mezbûrân için ahz u kabz oluna deyû sâdır olan emr-i şerîf-i celîlü’l-kadr mûcebince ben çiftlik-i mezbûru bi’l-vesâye da‘vâ ve bey‘-i mezbûr gabn-i fâhiş ile olduğu muvâcehesinde ba‘de’l-isbât hükm-i hâkimü’ş-şer‘ ile meblağ-ı mezbûru mezkûr Mehmed Ağa’ya teslîm ve çiftlik-i mezkûru kabz etmişidim çiftlik-i mezbûrun hîn-i bey‘de içinde mevcûd olup nicesinin a‘yânı mevcûd olmağla a‘yânını ve müstehlek olanının hâlâ kıymet cihetinden misli olduğu sâbit ve müte‘ayyin olan bir kebîr tencere ve iki vasat tencere ve bir tava ve beş kebîr sahan ve iki sagīr lengeri ve bir kebîr süt tavası ve bir kebîr bakır sini ve üç sacayak ve bir kebîr boyunduruk? ma‘a saban demiri ve üç karasaban demiri ve bir destere ve bir ışkı ve bir törpü ve demir küskü ve beş topak ve bir [de]mir tokmak ve iki tırpan ve dört çapa ve iki kazma ve bir sagīr boğaz çapası ve üç orak ve bir değirmen çekici ve bir harman ve bir sini ve bir tas-ı buhurdan ve bir gürz ve dört kalbur ve iki elek ve elli çuval ve iki kilim ve iki tekne ve bir yayık ve dört fıçı ve iki minder ve iki yastık ve dokuz kaz ve dört saban kayışı ve bir camus öküzü ve iki camus ineği ve iki çift kara sığır öküzü ve sekiz kara sığır ineği ve bir boğa ve üç kara sığır düğesi ve dana ve iki tosun ve beş buzağı ve on keçi ve dört oğlak ve dört araba ve bir el değirmeni ve elli keyl alef ve beş keyl mezrû‘ buğdayı bana edâ ve teslîm ben dahi ahz u kabz ve tesellüm eyledim eşyâ-i mezkûreden merhûm Mehmed Ağa’da bir şey bâkī kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’t-tâsi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan Ser-mi‘mârân-ı hâssa, kereste es-Seyyid Mehmed Çelebi, el-Hâc Ali Kethüdâ-yı mi‘mâr ağa, Halil Efendi, el-Hâc Hasan Ağa [b.] Mehmed Efendi.