İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 60 Hüküm no: 3 Orijinal metin no: [2-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Dimitri’nin kızı Sofya’nın hizmetinde bulunduğu Maryora’da alacak iddiasıyla açtığı davada Maryora’nın daha önce Sofya ile sulh olduğunu ispat ettiği Sofya Nasrâniyenin Maryora Nasrâniyeden ücret da‘vâsı men‘i Ma‘rûz Arzuhâl eden şahsı mu‘arrefe Sofya nâm bikr-i bâliğa babası Kürkçü Dimitri v. İsak nâm zimmî hâzır olduğu hâlde meclis-i şer‘-i hatîrde derûn-ı arzuhâlde ismi mastûre şahsı mu‘arrefe Maryora bt. Simyon nâm Nasrâniye muvâcehesinde işbu târihden sekiz sene mukaddem beni hâl-i sıgārımda babam hâzır-ı mersûm Dimitri’den senevî beş yüz guruş ücret mukāvelesiyle menzilinde kendine hizmet etmek üzere mersûme Maryora Nasrâniyeye bi’l-velâye îcâr ve teslîm edip ol dahi ber-vech-i muharrer istîcâr ve kabûl ettikden sonra ben hâl-i sıgārımda ve ba‘de’l-bulûğ yedi sene müddet mersûme Ma[r]yora Nasrâniyeye hizmet etmemle müddet-i mezkûrede ücret-i müsemmâmdan mersûme zimmetinde terâküm eden üç bin beş yüz guruşun yüz seksen guruşunu ba‘de’l-bulûğ kabz etmemle mâ‘adâsı olan üç bin üç yüz yirmi guruşu mersûme Maryora Nasrâniyeden hâlâ taleb ederim deyü ba‘de’d-da‘vâ ve’l-istintâk ol dahi cevâbında müdde‘iye-i mersûme Sofya Nasrâniyeyi babası hâzır-ı mersûm Dimitri zimmî yedinden nefs-i sıgārını ahz etmek üzere bana bırakıp müdde‘iye-i mersûme kable’l-bulûğ ve ba‘dehû ancak beş sene müddet yanımda mütemekkine olup ba‘dehû müfârakat eylediğinden sonra müdde‘iye-i mersûme Sofya Nasrâniye husûs-ı mezkûru işbu târih-i i‘lâmdan bir sene mukaddem bi-aynihî benden da‘vâya ibtidâr ve beni Patrikhâne’ye celb ile benimle yedi yüz guruş bedel-i medfû‘ ve makbûza sulh olduğunda ben dahi sulh-ı mezkûru kabûl ziyâde ücret mütâlebesine müte‘allika âmme-i da‘vâdan benim zimmetimi kabûlümü hâvî ibrâ-i âm ile ibrâ ve iskāt etmiş idi deyü müdde‘iye-i mersûmenin inkârına mukārin eylediği def‘ini her biri mahallerinde lede’t-tezkiye makbûlü’ş-şehâde idikleri ihbâr olunan Fener mütemekkinlerinden Sıvacı Beretamos v. Manol ve Çalgıcı Panayot v. Vasil nâm zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iye-i mersûme Sofya Nasrâniye da‘vâ-yı mezkûresiyle mersûme Maryora Nasrâniyeye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 12 Şa‘bân sene [12]57