İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 61 Hüküm no: 4 Orijinal metin no: [3-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Akif Ağa, Mehmed Atıf Bey ve diğer bazı şahısların mukataa taksitlerine ait Sarraf Serkiz ile muhasebelerinin görülüp zimmet ibrası yaptıkları Mehmed Akif Bey’in ve Mehmed Âtıf Bey’in ve sâirlerinin Sarrâf Serkiz zimmî ile ibrâları Ma‘rûz Ashâb-ı arzuhâl Enderûn-ı Hümâyûn’dan muhrec es-Seyyid Mehmed Akif Ağa b. es-Seyyid Mehmed kendi nefsinden asıl ve hâcegân-ı Dîvân-ı Hümâyûn’dan Mehmed Akif Bey b. Abdullah ve es-Seyyid Ahmed Ağa b. Abdullah b. Abdurrahman tarafından husûs-ı âti’l-beyânda vekîlleri olduğu es-Seyyid Hasan Efendi b. es-Seyyid Mehmed ve el-Hâc Süleyman Ağa b. Abdullah ve el-Hâc Yusuf Ağa b. Mehmed ve İbrahim Ağa b. Mustafa nâm kimesneler şehâdetleriyle sâbit olan el-Hâc Mehmed Salih Ağa b. Ahmed Nazif nâm kimesnelerden her biri meclis-i şer‘-i münîrde poliçeci tâifesinden derûn-ı arzuhâlde ismi mezkûr Serkiz v. Karabet nâm zimmî muvâcehesinde mukaddemâ sarrâf tâifesinden kezâlik derûn-ı arzuhâlde ismi mastûr Filibos v. Avanis zimmî hâzır olduğu hâlde asıl ve vekîl-i merkūmândan mezbûr es-Seyyid Mehmed Akif Ağa benim bâ-berât-ı âlî-şân mutasarrıf olduğum Vilâyet-i Anadolu’da Hudâvendigâr sancağında vâki‘ Kütahya Kazâsı’na tâbi‘ Hacı Bekir Alâaddin karyesi mukāta‘ası mâlından senevî altı bin yedi yüz elli guruş bedel-i maktû‘unu iki taksît ile Mâliye Hazîne-i Celîlesi’nden ahz olunmak üzere iki kıt‘a şartnâme ve ilmühaber sûretlerini ben ve vekîl-i merkūm el-Hâc Mehmed Salih Ağa yedinden kezâlik bâ-berât-ı âlî mutasarrıf olduğum Vilâyet-i Rumeli’nde Sofya nâhiyesinde vâki‘ Beşlavişce karyesi mukāta‘ası mâlından senevî sekiz bin yüz altmış dört guruş bedel-i maktû‘unu iki taksît ile hazîne-i mezkûreden ahzını nâtık iki kıt‘a şartnâme ve ilmühaber sûretlerini ben ve müvekkillerim merkūmândan mûmâ-ileyh Mehmed Akif Bey’den Rumeli’de Yenişehir sancağında vâki‘ Alasonya Kazâsı’nda vâki‘ bâ-berât-ı âlî mutasarrıf olduğu ze‘âmeti olan senevî altı bin altı yüz guruş bedel-i maktû‘unu kezâlik iki taksît ile hazîne-i mezbûreden ahz olunmak üzere iki kıt‘a şartnâme ve ilmühaber sûretlerini müvekkillerim merkūm Mehmed Âtıf Bey ve müvekkilim mersûm es-Seyyid Ahmed Ağa’dan Silistre Kazâsı’nda mutasarrıf olduğum mukāta‘a-i ma‘lûme mâlından senevî on dört bin yedi yüz altmış guruş bedel-i maktû‘unu bir taksît ile hazîne-i merkūmeden ahzını nâtık bir kıt‘a şartnâme ve ilmühaber sûretini müvekkilim merkūm es-Seyyid Ahmed Ağa’dan her birimiz hâzır-ı mersûm Filibos zimmî sarrâfımız olmak takrîbiyle yedine teslîm eylediğimizden sonra hâzır-ı mersûm Filibos zimmî’den mukāta‘ât-ı mezkûrelerin ilmühaberler sûretlerini mersûm Serkiz zimmîye teslîm edip ol dahi ba‘de’l-ahz asl-ı merkūm es-Seyyid Mehmed Akif Ağa benim mutasarrıf olduğumu mukāta‘am bedelinden taksît-i evveli olan üç bin üç yüz yetmiş beş guruş ve asıl ve vekîl merkūm el-Hâc Mehmed Salih Ağa benim mutasarrıf olduğum mukāta‘am bedelinden kezâlik taksît-i evveli olan dört bin sekiz yüz iki guruş ve müvekkillerim merkūmândan mûmâ-ileyh Mehmed Âtıf Bey tasarrufunda olan mukāta‘ası bedelinden taksît-i evveli olan üç bin üç yüz guruş ve merkūm es-Seyyid Ahmed Ağa’nın mutasarrıf olduğu mukāta‘ası bedeli olan on dört bin yedi yüz altmış guruş ki min-haysü’l-mecmû‘ yirmi beş bin dört yüz on yedi guruşu mersûm Serkiz zimmî hazîne-i merkūmeden ahz u kabz ve hâzır-ı mersûm Filibos zimmîye teslîm etmekle bizim ve müvekkilân-ı merkūmânın hâzır-ı mersûm Filibos zimmî ile beynimizde cârî ahz ü i‘tâmızın hesâblarını rü’yet edip ve meblağ-ı mecmû‘-ı mezkûru beynihimâlarımızda vukū‘ bulan muhâsebemize idhâl ve bâkī kalan üç kıt‘a sûretleri işbu meclis-i şer‘de mersûm Serkiz zimmî bize def‘ ü teslîm ve biz dahi yedinden ahz u kabz edip ol-vechile bizim ve müvekkillerimiz merkūmânın mersûm Serkiz zimmî zimmetinde bir akçe ve bir habbe alacağımız almayıp bi’l-cümle husûsât-ı mezkûreye müte‘allika âmme-i da‘vâdan biz bi’l-asâle ve bi’l-vekâle mersûm Serkiz zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimizde ol dahi ibrâ-i mezkûrumuzu kabûl eyledi deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu] Fî 25 Receb sene [12]57