İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 63 Hüküm no: 5 Orijinal metin no: [3-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Poliçeci Mardıros’un Vanlı Markar’a olan borcunu ödemesi Vanlı Markar zimmînin Mardıros zimmîden 4200 guruş hükmü Ma‘rûz Arzuhâl eden Vanlı Markar v. Agop nâm zimmî Pazartesi günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde poliçeci tâifesinden derûn-ı arzuhâlde ismi mastûr Mardıros v. Arakil nâm zimmî muvâcehesinde bin iki yüz elli dört senesi Saferi’l-hayrı’nın gurresi günü Havâss-ı Refî‘a kazâsına muzâfe Hasköy’de Pîrîpaşa nâm mahâlde vâki‘ berber dükkânında mersûm Mardıros zimmîye mâlımdan ikrâz ve teslîm ol dahi yedimden iktirâz ve kabz ve umûruna sarfla istihlâk ettiği dört bin iki yüz guruş mesfûr Mardıros zimmî zimmetinde alacağım olmağla meblağ-ı mezkûr dört bin iki yüz guruşu mersûm Mardıros zimmîden hâlâ taleb ederim deyü da‘vâ ettikde ol dahi cevâbında müdde‘î-i mersûm Markar zimmîden dört bin iki yüz guruş kabzını ikrâr ü i‘tirâf edip lâkin benim dahi mersûm Markar zimmînin li-ebeveyn er karındaşı olup Van Kazâsı’nda mütemekkin Kasdoni(?) zimmetinde cihet-i deyn-i şer‘îden dört bin iki yüz guruş alacağım olmağla medyûnum gāib-i mersûm Kasdoni beni deyn-i mezkûruyla karındaşı işbu mersûm Markar zimmî üzerine kabûlüne mevkūfe bâ-poliçe havâle eylediğinde ben dahi poliçe temessüğünü müdde‘î-i mersûma irâe ve havâle-i mezkûreyi ifâde eylediğimde ol dahi havâle-i mezkûreyi kabûl eylediğinden sonra meblağ-ı mezkûru bana edâ edip hattâ müdde‘î-i mersûm Markar zimmî işbu târihden üç ay mukaddem Çarşı-yı Kebîr’de Yağcı Hanı’nda benimle husûs-ı mezkûr için nizâ‘ edip ba‘dehû husûs-ı mezkûru ikrâr ve benim [4] zimmetimi ibrâ etmiş idi deyü eylediği def‘ini kirâren ve mirâren lede’l-istimhâl ve’l-imhâl her birinde müddet-i mehl-i şer‘î mürûr edip beyyineden izhâr-ı acz ve istihlâf ettikde mersûm Markar zimmîye bi’l-muvâcehe ber-nehc-i şer‘î yemîn verilip mûcebince dâfi‘-i mersûm Mardıros zimmî def‘-i mezkûruyla müdde‘î-i mersûma bilâ-beyyine mu‘ârazadan ba‘de’l-men‘ ikrâr ü i‘tirâfı mûcebince meblağ-ı mezkûr dört bin iki yüz guruşu müdde‘î-i mersûm Markar zimmîye edâ ve teslîme mesfûr Mardıros zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. El-emrü li-men-lehü’l-emr. Fî 11 Şa‘bân sene [12]57