Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 444 Hüküm no: 523 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın hileli fiyat ile satın aldığı eşya davasının reddi Min mümzâtihî Mahmiye-i İstanbul’da Camcı Ali mahallesinde sâkin olup Mehmed Çelebi b. Mustafa saray-ı kāimmakām-ı hazret-i sadr-ı a‘zamîde ma‘kūd-ı meclis-i şer‘-i şerîfi enverde bâ‘isü hâze’l-kitâb Mehmed Ağa b. Sinan mahzarında üzerine da‘vâ ve takrîr-i kelâm edip mezbûr Mehmed Ağa bundan akdem bana üç yüz esedî guruş karz ve teslîm ben dahi iktirâz ve kabz [ve] tesellüm eylediğimden sonra bir yaldızlı leğen ma‘a ibrik ve bir sîm debbûs ve samur parçası kürk ve altın kef? bir çift üzengiyi dahi yüz elli esedî guruşa safka-i vâhide ile bana nesîeten bey‘ ve teslîm ben dahi iştirâ ve kabz ve mârrü’z-zikr leğen ma‘a ibrik ve kürk ve üzengiyi istihlâk etmişdim eşyâ-i mezbûr gabn-i fâhiş ile bey‘ olunup ve mârrü’z-zikr debbûsun hâlâ aynı yedimde mevcûd olup nesîeten bey‘i câ’iz olmamağla eşyâ-i mezkûrenin kıymet-i şer‘iyyeleri ile mârrü’z-zikr debbûsun aynı teslîmi murâdımdır suâl olunsun dedikde mezkûr Mehmed Çelebi mârrü’z-zikr debbûsun mâ‘adâsını istihlâk [86a] eylediğini i‘tirâf etmekle meblağ-ı mezbûr yüz elli guruşun mârrü’z-zikr debbûsun kıymetine müsâvî olan meblağdan mâ‘adâ ile zikr olunan debbûsun aynını mezkûr Mehmed Ağa’ya aynıyla teslîmi lâzım gelmekle mezkûr Mehmed Çelebi’nin istihlâkinin aynına müte‘allika da‘vâsına bilâ-da‘vâ’t-tağrîr iltifât olunmayıp işbu vesîka bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Beşe b. Abdurrahman, Süleyman b. Ahmed, Mustafa Çelebi b. Abdurrahman, İbrahim Çelebi b. Ahmed.