İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 64 Hüküm no: 7 Orijinal metin no: [4-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Kostanti’nin kendisini yaralayan Kayıkçı Mehmed’e açtığı davada yüz elli kuruş karşılığında sulh olduğu Simidci Kostanti zimmînin Kayıkçı Mehmed ile cerh da‘vâsından 150 guruşa sulhu Ma‘rûz Arzuhâl eden simidci tablakârı Kostanti v. Vasil nâm zimmî meclis-i şer‘-i hatîrde derûn-ı arzuhâlde ismi mastûr Kayıkçı Mehmed b. Hüseyin nâm kimesne muvâcehesinde işbu târih-i i‘lâm şehrinin on üçüncü Salı gecesi sâ‘at dört buçuk karârlarında mahrûse-i Galata’ya muzâfe Kasaba-i Kasımpaşa’da Kışlak Meydanı’nda mütemekkin olduğum simidci fırını önünde merkūm Mehmed amden ve bi-gayrı hakkın Çerkes bıçağı ile sol kolumun bir yerinden darb ve cerh etmekle mûcib-i şer‘îsini taleb ederim deyü tasaddî eylediğim da‘vâmdan bâ-tavassut-ı muslihîn merkūm Mehmed ile an-inkârin kat‘a li’n-nizâ‘ yüz elli guruş bedel-i medfû‘ ve makbûza bi’t-terâzî sulh olduğumda ol dahi sulh-ı mezkûru ba‘de’l-kabûl merkūm Mehmed zimmetinde cihet-i deyn-i şer‘îden alacağım olan yüz elli guruşdan mâ‘adâ bi’l-cümle husûs-ı mezkûra ve mâ-yuhdesü minhe müte‘allika âmme-i da‘vâdan mezbûr Mehmed’in zimmetini ibrâ-i âmm-ı sahîh-i şer‘î ile kabûlünü hâvî ibrâ ve iskāt eyledim deyü ba‘de’l-ikrâr ve’t-tasdîk ibrâdan müstesnâ kılınan meblağ-ı mezkûr yüz elli guruşu müdde‘î-i mersûm Kostanti zimmîye bi’t-taleb edâ ve teslîme merkūm Mehmed’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 28 Receb sene [12]57