İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 65 Hüküm no: 8 Orijinal metin no: [4-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Geyveli Yani’nin ödemeye gücü yetmediği borçlarını ödemesi için beş sene mühlet verildiği Geyveli Yani zimmînin tecîl i‘lâmı. Ma‘rûz Mübârek rikâb-ı kamer-tâb-ı mülûkâneye takdîm-i arzuhâl eden Geyveli Yani zimmînin dâyinlerinden Sarrâf Hazer v. Nikola zimmî ve Yani v. Kostanti v. Atam zimmînin kayınanası ve tarafından husûs-ı âtîde vekîl olduğu Varilci Yani v. Markar ve İstavri v. Yani zimmîler şehâdetleriyle sâbit olan şahsı mu‘arrefe Piruze bt. Todori nâm Nasrâniye meclis-i şer‘-i münîrde sâhib-i arzuhâl mersûm Yani v. Anaştaş zimmî muvâcehesinde mersûm Hazer zimmî benim mesfûr Yani zimmî zimmetinde cihet-i deyn-i şer‘îden iki bin guruş ve vekîl-i mersûm Piruze Nasrâniye güveyim ve müvekkilim mersûm Yani zimmînin dahi kezâlik mersûm zimmetinde cihet-i mezkûreden altı bin beş yüz guruş alacağımız olup lâkin meblagayn-ı mezkûreyni zimmî-i mersûmun hâlen ve def‘aten edâya bir vechile iktidârı olmamağla ber-vech-i âtî istimhâl eylediğinde mersûm Hazer zimmî ben dahi alacağım olan meblağ-ı mezkûr iki bin guruşu ve vekîl-i mersûm Piruze Nasrâniye ben dahi müvekkilim mersûm Yani zimmînin alacağı olan meblağ-ı merkūm altı bin beş yüz guruşu işbu târih-i i‘lâmdan beş sene mürûrunda edâ ve teslîm etmek üzere mersûm Yani zimmîyi bi’l-asâle ve bi’l-vekâle imhâl ve tecîl eylediğimizde ol dahi kabûl ve meblagayn-ı mezkûreyni ber-vech-i muharrer mu‘ahharan ve mümehhelen edâya ta‘ahhüd eyledi deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu] Fî-gurreti Şa‘bân sene [12]57