Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 449 Hüküm no: 529 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyrem bt. Sadet’e ait arsanın vârisler arasında paylaşılması Husûs-ı câ’i’z-zikri mahallinde keşf ve tahrîr için fermân-ı şerîf vârid olmağın imtisâlen-leh savb-ı şer‘den irsâl olunan Mevlânâ es-Seyyid Abdülmu‘tî Efendi hâssa mi‘mârlardan üstâd Mehmed Halîfe b. Abdullah ve Ahmed Halîfe b. Mehmed ile mahmiye-i İstanbul’da Şeyh Ferhad mahallesinde vâki‘ menzil-i âti’l-beyâna varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i âlî eyledikde mahalle-i mezbûrda sâkin iken bundan akdem hâlik olan Meyrem bt. Sadet v. Dador nâm nasrâniyenin verâseti zevc-i metrûkü Asvador v. Nora ve sadrî kebîr oğlu mecnûn Aroni ve kebîre kızı Sultana’[ya] münhasıra olduğu mütehakkik oldukdan sonra mezbûr Meyrem ba‘de’t-ta‘rîfi’ş-şer‘î meclis-i ma‘kūd-ı mezkûrda babası mezbûr Asvador muvâcehesinde takrîr-i kelâm edip mahalle-i mezbûrede vâki‘ bir tarafdan Şehri ve Tahnıyaz ve bir tarafdan Sinan ve Abraham mülkleri ve bir tarafdan Arakil Kalo menzili ve bir tarafdan tarîk-i âmla mahdûd hâricen ve dâhilen büyût-ı adîde ve bahçeyi müştemil olan işbu mülk menzil ceddim mezbûr Sadet hayâtında mülkü iken mezbûr Sadet menzil-i mezbûr arsanın iki yüz sekiz zirâ‘ı kızı hâlike-i merkūmeye ba‘de’l-ikrâr hibe ve iki yüz otuz üç zirâ‘ dahi bey‘ ve teslîm ve mâ‘adâsını kendi için alıkoyup ba‘dehû menzil-i mezbûrun ebniyesi bin yetmiş senesinde vâki‘ harîk-i ekberde muhterik ve i‘lâmâtı zâil oldukdan sonra kendi için alıkoyduğu arsa-i mezbûreyi ve akārı babam mezbûr Asvador semen-i ma‘lûma bey‘? ve teslîm etmişidi hâlâ menzil-i [87b] mezbûrun mecmû‘-ı arsası mesâha ve tahmîn ve vâlidemden irsen bana isâbet eden hukūkun mikdârı tesbît olunmak matlûbumdur dedikde gıbbe’t-tasdîki’ş-şer‘î mi‘mârân-ı mezbûrân menzil-i mezbûrun arsasını bi’l-muvâcehe mesâha ve tahmîn eylediklerinde bahçesi tûlen yirmi beş ve arzen iki başdan sekiz zirâ‘ ile altı parmak ve dâhiliyyesi bir tarafdan on dört buçuk ve arzen on iki buçuk zirâ‘ ve bir tarafdan dahi tûlen otuz altı buçuk ve arzen iki başdan sekiz zirâ‘ ve hâriciyyesi tûlen yedi ve arzen yedi zirâ‘ min haysi’l-mecmû‘ menzil-i mezbûr arsası bi hesâb-ı terbî‘î yedi yüz yirmi sekiz zirâ‘a bâliğ olup mecmû‘-ı mezbûrun bi’t-terâzî yüz yirmi zirâ‘ı mezbûre Sultana’nın hissesine ve altı yüz kırk zirâ‘ı mezbûr Aroni’nin hissesine ve bâkī üç yüz altmış sekiz zirâ‘ı irsen şirâen babaları mezbûr Asvador’un hissesine ta‘yîn ve tahsîs olundukdan sonra vâki‘ hâli Mevlânâ-yı mezbûr mahallinde tahrîr [ve] ma‘an irsâl olunan Mehmed b. Ahmed ile meclis-i şer‘a gelip alâ vukū‘ihî inhâ ve i‘lâm etmekle mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Fahrü’l-müderrisîn İbrahim Efendi, Osman Halîfe b. ( ) Müezzin, Ahmed Çelebi b. Mehmed Yusuf, mumcu Süleyman Beşe b. Mustafa el-Mübâşir.