İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 185 Hüküm no: 136 Orijinal metin no: [60-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fesci Karabet’in Kuyumcu Oseb’e olan borcunu ödemesi için yapılan tenbih 1152,5 [guru]şa hükm [Ma‘rûz] Kuyumcu Oseb v. Artin nâm zimmî meclis-i şer‘-i hatîrde Fesci Karabet v. Agop nâm zimmî muvâcehesinde işbu sene-i mübâreke Recebi’l-ferd’inin üçüncü günü târihiyle müverrah mersûmun mührüyle memhûr bir kıt‘a tahvîl mantûkunca cihet-i karzdan bin iki yüz elli iki buçuk guruşdan bâkī bin yüz elli iki buçuk guruş mersûm Karabet zimmî zimmetinde alacağım olmağla meblağ-ı bâkī-i mezkûr bin yüz elli iki buçuk guruşu mersûm Karabet zimmîden hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihî meblağ-ı bâkī-i mezkûr bin yüz elli iki buçuk guruşun müdde‘î-i mersûm Oseb zimmîye edâsıyla mersûm Karabet zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. El-emrü li-men-lehü’l-emr. Fi’l-yevmi’l-hâmis aşer min-Zilka‘deti’ş-şerîfe li-sene seb‘a ve hamsîn ve mi’eteyn ve elf.