İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 185 Hüküm no: 137 Orijinal metin no: [61-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Kigork’un vârislerinin Berber Aci Aleksan’a açtıkları gedik ve dükkân hissesi davalarında haksız bulundukları Ma‘rûz Arzuhâl eden Kigork zimmî ile li-ebeveyn kız karındaşı şahsı mu‘arrefe Ahsabet Nasrâniyeden her biri bi’l-ma‘iye rü’yete memûr Evkāf-ı Hümâyûn müfettişi fazîletlü semâhatlü Mîr es-Seyyid Mehmed Emin Âsaf Efendi hâzır olduğu hâlde Pazartesi günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde derûn-ı arzuhâlde ismi mastûr Berber Aci Aleksan v. Latfik nâm zimmî muvâcehesinde mersûm Aci Aleksan zimmînin yedinde olmağla ibrâz ve kırâet olunup işbu sene-i mübâreke Cumâdelâhiresinin beşinci günü târihiyle müverrah İstanbul Mahkemesi’nden verilen bir kıt‘a i‘lâm-ı şer‘î nâtık olduğu üzere İstanbul’da Mahmudpaşa kurbünde Sultan Odaları karşısında Büyük Yıldızhanı tahtında tönbekici ve terzi dükkânları beynlerinde kâin nezâreti Haremeyn-i Muhteremeyn’e mülhak evkāfdan Defterdâr-ı esbak merhûm Abdüsselam Efendi Vakfı müsakkafâtından bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf hissesi verâseti bizimle zevcesi anamız Uskohi Nasrâniyeye mevrûs olduğu hâlde on iki sene mukaddem hâlik olan babamız Ohannes v. Kigork v. Atam zimmînin sağlığında ile’l-helâk yedinde mülkü ve ba‘de helâkihî nısf gedik-i mezkûr bizimle anamız gāibe-i mersûme Uskohi Nasrâniyeye mevrûs olmuş iken mersûm Aci Aleksan zimmî nısf gedik-i mezkûru fuzûlî ve bi-gayrı hakkın bir takrîb zabt eylediğinden sonra nısf-ı âharı dahi kendinin mülk-i müşterâsı olmağla mecmû‘-ı âlât-ı gedik-i mezkûru elli dört senesi Cumâdelâhiresinin on altıncı günü cânib-i Evkāf-ı Haremeyn-i Muhteremeyn’e terk ve teberrük birle bi’l-icâreteyn istîcâr etmekle biz hisse-i mezkûremizin ber-minvâl-i muharrer vakfiyetine mücîzler olmamızla hissemizden keff-i yed ve ber-vech-i <> vakfiyet bize teslîme mersûm Aleksandri zimmîye tenbîh olunmak murâdımızdır deyü anamız gāibe-i mersûme ile mesfûr Aci Aleksan zimmîden ma‘an da‘vâ eylediğimizde mersûm Aci Aleksan zimmî dahi cevâbında yedinde olup bin iki yüz otuz altı senesi Zilhiccetü’ş-şerîfesinin altıncı günü târihiyle müverraha bir kıt‘a mübâya‘a hücceti nâtıka olduğu üzere babanız hâlik-i mersûm ber-vech-i muharrer mâlik olduğu nısf gedik-i mezkûru sağlığında tarafeynden bi’l-îcâb ve’l-kabûl bâtten ve sahîhan şurût-ı müfsideden ârî beş bin yüz guruş semen-i medfû‘ ve makbûza bana bey‘ ü temlik ve lâyıkı vechile teslîm eylediğinde ben dahi ber-vech-i muharrer iştirâ ve temellük ve tesellüm ve kabz ü kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü [hâvî] ibrâ ve iskāt etmişidik deyü eylediği def‘ini ve mazmûn-ı hüccet-i mezkûreyi her birimiz tâyi‘an ve kat‘iyyen ikrâr ü i‘tirâf etmemizle mûcebince biz da‘vâ-yı mezkûremizle mersûm Aci Aleksan zimmîye bî-vech-i şer‘î mu‘ârazadan men‘ olunmuş idik ve gedik-i mezkûrun mevzû‘ olduğu dükkân-ı mezbûr mersûm Aci Aleksan zimmînin yedinde olan mütevellî temessüğü ve defter-i vakf derkenârı nâtıklar olduğu üzere babamız hâlik-i mesfûrun bâ-re’y-i mütevellî tasarrufuna dâhil olmayıp mersûm Aci Aleksan zimmînin âhardan bi’t-tefevvüz bâ-temessük-i mütevellî bi’l-icâreteyn uhde-i tasarrufunda ise de ancak gedik-i mezkûrun nısf hissesi babamız hâlik-i mersûmun sağlığında yedinde mülkü olduğu takdîrce dükkân-ı mezkûrun dahi nısf hisse-i şâyi‘ası babamız hâlik-i mersûmun uhde-i tasarrufunda olmak iktizâ etmekle öyle olucak dükkân-ı mezkûrun nısf hissesinden keff-i yed ve bâ-ma‘rifet-i mütevellî bize teslîme mersûm Aleksan zimmîye cebr ve tenbîh olunmak murâdımızdır deyü ricâl-i Devlet-i aliyyeden hâlâ Evkāf nâzırı sa‘âdetlü atûfetlü Numan Mahir Beyefendi kıbelinden memûr el-Hâc İbrahim Ağa hâzır olduğu hâlde takrîr-i meşrûhları üzere tasaddî eyledikleri da‘vâları müvecceh <> ve iltifâta şâyân olmadığı müdde‘iyân-ı mersûmân Kigork zimmî ve Ahsabet Nasrâniyeye tefhîm ve da‘vâ-yı mezkûreleriyle mersûm Aci Aleksan zimmîye bî-vech-i şer‘î mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu] Fî 24 L sene [12]57