İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 187 Hüküm no: 138 Orijinal metin no: [61-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yelkenciler Kethudası Mahmud Ağa’nın, vefat eden dükkân kiracısı Bezci Dimitri’deki kira alacaklarının terekesinden ödenmesi Mukābele şüd [Ma‘rûz] Derûn-ı arzuhâlde ismi mezkûr Yelkenciler Kethudâsı el-Hâc Mahmud Ağa b. el-Hâc Mehmed meclis-i şer‘-i münîrde kezâlik derûn-ı arzuhâlde mastûrü’l-ism olup bin iki yüz elli beş senesi hilâlinde hâlik olan Bezci Dimitri v. Abraham v. Atam zimmînin verâseti zevce-i metrûkesi Maryem bt. Yordam ve sulbiye kebîre kızları Despina ve diğer Maryem Nasrâniyelere ve li-ebeveyn er karındaşları Yuvan ve Eftim Simyonos zimmîlere münhasıra ve mesele-i mîrâsları kırk sekiz sehmden olup sihâm-ı mezbûreden altı sehmi zevce-i mersûme Maryem Nasrâniyeye ve on altışar sehmden otuz iki sehmi kızları mersûmetân Despina ve diğer Maryem Nasrâniyelere ve beşer sehmden on sehmi karındaşları mersûmâna isâbeti tahakkukundan sonra verese-i mersûmûndan kendiden asıl ve mersûmûn Maryem ve Despina ve diğer Maryem Nasrâniyeler ve Yuvan zimmî taraflarından bin iki yüz elli altı senesi Muharremi’l-harâmının on beşinci günü târihiyle müverraha ve hâlâ Evkāf-ı Hümâyûn müfettişi fazîletlü semâhatlü Mîr es-Seyyid Mehmed Emin Âsaf <> Efendi’nin imzâ ve mührünü hâviye bir kıt‘a isbât-ı vekâlet hücceti nâtıka olduğu üzere vekîl-i sâbitü’l-vekâleleri olup tereke-i hâlik-i mersûma <> bi’l-verâse ve bi’l-vekâle vaz‘-ı yedi mütehakkık olan sâhib-i arzuhâl mersûm Eftim Simyonos zimmî muvâcehesinde hâlik-i mersûmun sağlığında mahrûse-i Galata’da Kürkçükapısı kurbünde Yelkenciler içinde vâki‘ ma‘lûmü’l-hudûd bir bâb mağazada kirâ-yı ma‘lûm ile müşâhereten müstecirim olmağla müddet-i ma‘lûmede mağaza-i mezkûrenin terâküm eden kirâsının ve mâlımdan hâlik-i mersûma sağlığında ikrâz ve teslîm eylediğim mebâliğin hesâbını bin iki yüz elli dört senesi Şa‘bâni’l-mu‘azzamı’nın on beşinci günü hâlik-i mersûm Dimitri zimmî ile sağlığında sehv ve galatdan ârî yegân yegân sahîhan <> rü’yet eylediğimizde benim hâlik-i mersûm zimmetinde dokuz bin beş yüz guruş <> alacağım zuhûr eylediğinden sonra hâlik-i mersûm meblağ-ı mezkûr zimmetinde sahîhan bana deyni olduğunu ikrâr ü i‘tirâf eylediğinden sonra meblağ-ı mezkûr dokuz bin beş yüz guruşun altı bin iki yüz elli guruşunu hâlik-i mersûm sağlığında bana edâ ve teslîm edip bâkīsi olan üç bin iki yüz elli guruşu edâ etmeksizin hâlik olmağla meblağ-ı bâkī-i mezkûr üç bin iki yüz elli guruşu mersûm Eftim Simyonos zimmînin bi’l-verâse ve bi’l-vekâle vâzı‘ü’l-yed olduğu tereke-i hâlik-i mersûmdan hâlâ taleb ederim deyü da‘vâ ettikde ol dahi cevâbında müdde‘î-i merkūmun ber-vech-i muharrer müdde‘âsını bi-tamamihi ikrâr ü i‘tirâf etmeğin mûcebince meblağ-ı mezkûr üç bin iki yüz elli guruşu vâzı‘ü’l-yed olduğu tereke-i hâlik-i mersûmdan müdde‘î-i merkūm el-Hâc Mahmud Ağa’ya teslîme asıl ve vekîl-i mersûm Eftim Simyonos zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 17 min-Za sene [12]57