İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 188 Hüküm no: 140 Orijinal metin no: [62-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmameci Mustafa Ağa’nın Ahmed Bey’e olan borcunu ödeyip rehin bıraktığı altın ve eşyalarını geri alması için yapılan tenbih Ma‘rûz Sâhib-i arzuhâl Ahmed Bey b. Mehmed Said nâm kimesne meclis-i şer‘-i münîrde derûn-ı arzuhâlde ismi mezkûr İmâmeci es-Seyyid Mustafa Ağa b. es-Seyyid Ömer muvâcehesinde yedimde olup işbu sene-i mübâreke Cumâdelûlâsı’nın altıncı günü târihiyle müverrah imzâ <> ve mührünü hâvî bir kıt‘a temessük mantûkunca mezbûr es-Seyyid Mustafa Ağa zimmetinde iki bin guruş alacağım olup merkūm es-Seyyid Mustafa Ağa’nın deyn-i mezkûru mukābelesinde mâlından bir gümüş zencir meslük? yirmi dört aded mahmûdiye altınını yedime rehn ü vaz‘ ve teslîm etmiş idi el-hâletü hâzihî meblağ-ı mezkûr iki bin guruş ve hâric ez-temessük mezbûrun zimmetinde mâlımdan ve yedimden iştirâ ve kabz eylediği bir top kumaş semeninden dahi alacağım olan yüz guruş ki cem‘an iki bin yüz guruşu bana edâ ve teslîm ve zikr olunan altınları rehniyetden [fek] ve tahlîs etmek üzere merkūm es-Seyyid Mustafa Ağa’ya tenbîh olunmak murâdımdır deyü da‘vâ <> ettikde ol dahi cevâbında kaziyye minvâl-i meşrûh üzere olup meblağ-ı mecmû‘-ı mezkûr iki bin yüz guruş müdde‘î-i merkūma zimmetinde sahîhan deyni olduğunu tâyi‘an ve kat‘iyyen ikrâr ü i‘tirâf etmekle mûcebince meblağ-ı mecmû‘-ı mezkûr iki bin yüz guruş müdde‘î-i mezbûr Ahmed Bey’e edâ ve teslîm birle fekk-i rehn etmek üzere mezbûr es-Seyyid Mustafa Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 17 min-Za sene [12]57