İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 189 Hüküm no: 141 Orijinal metin no: [62-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yunanlı Zaharya’nın vârislerinin terekeden olan dükkân hisselerini Bakkal Kiryako’ya satmak üzere anlaştıkları [Ma‘rûz] Derûn-ı takrîrde ismi mastûr Yunanlı olup bundan akdem Âsitâne-i aliyye’de mukīm ve ba‘dehû memleketi olan diyâr-ı Yunan’da Kerpeniş Kazâsı’nda mütemekkin iken hâlik Zaharya v. Yani v. Niko’nun verâseti hâlâ kazâ-i mezbûrda mütemekkinler zevce-i metrûkesi Yunanlı Katrine bt. Dimitri v. Atam Nasrâniye ile sulbî kebîr oğulları Yunanlı Yorgi ve Kostandi ve sagīr oğulları Vasil ve Nikola ve Yani ve sagīre kızı Elini ve diğer kebîr oğlu olup bu esnâda Âsitâne-i sa‘âdet’e gelen Yunanî Dimitri’ye ba‘de’l-inhisâr nefsinden asıl ve anası ve li-ebeveyn er karındaşları mersûmûn Katrine Nasrâniye ve Yorgi ve Kostandi taraflarından husûs-ı âtîde vekîl-i sâbitü’l-vekâleleri ve sıgār-ı gāibûn-ı mersûmûnun dahi vasîyy-i mansûbları olan mersûm Dimitri tercümânı Sava hâzır olduğu hâlde meclis-i şer‘-i hatîrde bakkāl esnâfından kezâlik derûn-ı takrîrde ismi mastûr Kiryako v. Vasil zimmî muvâcehesinde işbu yedimde olup târih-i i‘lâm senesi Şa‘bâni’l-mu‘azzamı’nın beşinci günü târihiyle müverrah ve hâlâ Sadr-ı Rumeli Meşreb Efendizâde devletlü inâyetlü Abdurrahman Efendi hazretleri ile bi’l-ma‘iye rü’yete memûr Evkāf müfettişi fazîletlü semâhatlü Mîr es-Seyyid Mehmed Emin Âsaf Efendi’nin hâtemleriyle mahtûm bir kıt‘a i‘lâm-ı şer‘î nâtık olduğu üzere İstanbul’da Alacahamam civârında Çelebioğlu Alâaddin mahallesinde vâki‘ Hacı Mahmud Dükkânı demekle meşhûr ma‘lûmü’l-hudûd bir bâb ahşâb bakkāl dükkânı ile dükkân-ı mezkûr civârında dükkân-ı mezkûra merbût kezâlik Hacı Mahmud Dükkânı demekle arîf ma‘lûmü’l-hudûd bir bâb kârgîr bakkāl dükkânı derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmi beş sehm i‘tibârıyla yirmi beş sehm hisse-i şâyi‘aları babam ve mûrisim hâlik-i mersûm Yunanlı Zaharya’nın sağlığında ile’l-helâk yedinde mülk ve hakkı olmağla babam ve mûrisim hâlik-i mersûm hisse-i mezkûreleri bir Müslime yâhûd bir zimmîye bey‘ etmek sadedinde olup lâkin kable’l-bey‘ hâlik ve yirmi beş sehm hisse-i şâyi‘a-i merkūmlar benimle verese-i sâire-i mesfûresine mevrûs olmuş iken mersûm Kiryako zimmî bin iki yüz elli altı senesi Muharremi’l-harâmının on ikinci gününden târih-i i‘lâm-ı mezkûra gelince hisse-i mezkûreleri bi-gayrı hakkın fuzûlî zabt ve vaz‘-ı yed eder olduğuna mebnî yirmi beş sehm hisse-i şâyi‘a-i mezkûreleri mersûm Kiryako zimmîlerin bi’l-asâle ve bi’l-vekâle da‘vâ etmemle hisse-i mezkûreleri bir Müslime veyâhûd bir zimmîye bey‘ etmek üzere benimle verese-i sâire-i mersûmûnun zabt ü tasarruflarımıza hükmolunmağla ahz etmiş idim lâkin mersûm Kiryako <> zimmî hisse-i şâyi‘a-i merkūmeleri müddet-i mezkûrede kirâ-yı ma‘lûm ile âhara îcâr ve kirâ-yı mezkûru dahi ahz ve istihlâk etmekle ber-vech-i muharrer makbûzu olan kirâ-yı mezkûru mersûm Kiryako zimmîden bi’l-asâle ve bi’l-vekâle inkâra mukārin da‘vâya tasaddî etmiş idim el-hâletü hâzihî ben da‘vâ-yı mezkûremden meccânen fâriğ olup bi’l-cümle husûs-ı mezkûra müte‘allika da‘vâdan mersûm Kiryako zimmînin zimmetini ancak bi’l-asâle ve bi’l-vekâle kabûlünü hâvî ibrâ ve iskāt edip ve ber-mûceb-i nizâm-ı müstahsene hisse-i şâyi‘a-i mezkûreleri dahi sekiz bin <> beş yüz guruş semen mukābelesinde mersûm Kiryako zimmîye bey‘e müte‘ahhid olduğumda ol dahi ber-vech-i muharrer ta‘ahhüdüme râzı olmağla bu vechile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu] Fî 9 min-Za sene [1]257