İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 190 Hüküm no: 142 Orijinal metin no: [62-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahib Partenbus’un, Bakkal Aci Manol’daki alacağını ödemesi için Manol’a mühlet verdiği [Ma‘rûz] Bâ‘is-i i‘lâm Partenbus v. Yorgi nâm râhib meclis-i şer‘-i hatîrde bakkāl tâifesinden Aci Manol v. Paskal nâm zimmî muvâcehesinde tâife-i mersûmeden Aci Apostol v. Yuvan nâm zimmî hâzır olduğu hâlde mersûm Aci Manol zimmî zimmetinde yedimde olup târih-i İseviye’nin bin sekiz yüz kırk senesi Ohtemriyos(?) ayının ibtidâsı günü târihiyle müverrah ve mersûm Aci Manol zimmî ile hâzır-ı mersûmun imzâlarını hâvî Rumiyyü’l-ibâre bir kıt‘a temessük mantûkunca mersûm Aci Manol zimmînin mâlımdan ve yedimden iktirâz ve kabz ve umûruna sarfla istihlâk edip alacağım olan üç bin guruşa hâzır-ı mersûm Apostol zimmî tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile kefîl ve zâmin olmağla meblağ-ı mezkûr üç bin guruşu bana edâya asıl ve kefîl hâzır-ı mersûmân Aci Manol ve Aci Apostol zimmîlere asâleten ve kefâleten ma‘an tenbîh olunmak murâdımdır deyü da‘vâ eylediğimde onlar dahi cevâblarında benim ber-vech-i muharrer müdde‘âmı her biri bi-tamamihi tasdîk ve i‘tirâf eylediklerinden sonra asıl-ı mersûm Aci <> Manol zimmî ben meblağ-ı mezkûr üç bin guruşu senden on sene mukaddem iktirâz edip târih-i mezkûrdan işbu târih-i i‘lâma gelince müddet-i mezkûrda bilâ-devr murâbaha olarak sana medfû‘um olan dört bin beş yüz guruşun üç bin guruşunu deyn-i mezkûruma takas ve mahsûb olunup mâ‘adâsı olan bin beş yüz guruşu hâlâ senden istirdâd ederim deyü inkârıma mukārin benden ber-minvâl-i muharrer murâbaha da‘vâsına tasaddî etmiş idi el-hâletü hâzihî mersûm Aci Manol zimmî da‘vâ-yı mezkûresinden fâriğ olup bi’l-cümle husûs-ı mezkûra müte‘allika âmme-i da‘vâdan benim zimmetimi kabûlümü hâvî ibrâ ve iskāt edip ben dahi alacağım olan meblağ-ı mezkûr üç bin guruşu mersûm Aci Manol zimmînin hâlen ve def‘aten edâya iktidârı olmamağla meblağ-ı mezkûru işbu târih-i i‘lâmdan iki buçuk sene hitâmında bana tamamen edâ etmek üzere mesfûr Aci Manol zimmîyi rızâmla imhâl ve tehîr eylediğimde ol dahi kabûl ve meblağ-ı mezkûr üç bin guruşu mehl-i mezkûr hulûlünde bana edâya ta‘ahhüd eyledi deyü mukırr-ı müdde‘î-i mersûm Partenbus Râhib’in bi’l-cümle takrîrini mersûm Aci Manol <> ve hâzır-ı mersûm Aci Apostol zimmîlerden her birinin tasdîk eyledikleri İstanbul Mahkemesi’nden huzûr-ı [âlîlerine i‘lâm olundu] Fî 22 min-Za sene [12]57