İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 191 Hüküm no: 143 Orijinal metin no: [63-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haydar Ağa’nın Ahmed Ağa’ya olan borcunu ödediğini ispat ettiği Ma‘rûz Sâhib-i arzuhâl es-Seyyid Ahmed Ağa b. Abdullah meclis-i şer‘-i münîrde derûn-ı arzuhâlde mezkûrü’l-ism Haydar Ağa b. İbrahim muvâcehesinde ben bin iki yüz elli beş senesi hilâlinde Anadolu’da Bolu sancağında vâki‘ Çağa Kazâsı a‘yânı ve merkūm Haydar Ağa sancağ-ı mezkûr mütesellimi Serbevvâbîn-i Dergâh-ı âlî İsmail Ağa’nın teba‘asından iken mezbûr Haydar Ağa’ya sene-i merkūme Şa‘bâni’l-mu‘azzamı’nın yirmi sekizinci günü kazâ-i mezkûrda mâlımdan ikrâz ve teslîm ol dahi yedimden iktirâz ve kabz ve umûruna sarfla istihlâk eylediği bin iki yüz elli guruş merkūm Haydar Ağa’nın zimmetinde alacağım olmağla meblağ-ı mezkûru mezbûr Haydar Ağa’dan hâlâ taleb ederim deyü da‘vâ ettikde ol dahi cevâbında müdde‘î-i mezbûrun ber-minvâl-i muharrer müdde‘âsını ikrâr ü i‘tirâf edip lâkin ben meblağ-ı mezkûr bin iki yüz elli guruşun sekiz yüz guruşunu beher adedi yüzer guruş mu‘acceleli sekiz aded sehm kāimesi ve dört yüz elli guruşunu beyaz beşlik olarak müdde‘î-i mezbûra işbu sene-i mübâreke Muharremi’l-harâmının on sekizinci günü İstanbul’da Osmaniye kurbünde Sofcular Hanı’nda el-Hâc Mehmed Emin Ağa’nın odasında tamamen edâ ve teslîm etmiş idim deyü ba‘de’d-def‘ ve’l-inkâr dâfi‘-i merkūm Haydar Ağa ber-vech-i muharrer eylediği def‘ini her biri mahallerinde lede’t-tezkiye adl ve makbûlü’ş-şehâde idikleri ihbâr olunan Fesci Mehmed Tâhir Ağa b. Hasan ve hademeden Feyzullah Ağa b. Hamdullah nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince müdde‘î-i mezbûr es-Seyyid Ahmed Ağa da‘vâ-yı mezkûresiyle merkūm Haydar Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 24 min-Za sene [12]57