İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 192 Hüküm no: 144 Orijinal metin no: [63-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırlılı Halil’in alacak iddiasıyla Mehmed Abdülaziz Ağa’ya açtığı alacak davasını ispat edemediği [Ma‘rûz] Hudâvendigâr sancağında vâki‘ Aydıncık kasabası mahallâtından Karakadı mahallesi ahâlisinden derûn-ı mazbatada ismi mezkûr Katırlılı Halil b. Mustafa nâm kimesne meclis-i şer‘-i münîrde Dergâh-ı âlî kapıcıbaşılarından es-Seyyid Mehmed Abdülaziz Ağa b. Osman muvâcehesinde merkūm es-Seyyid Mehmed Abdülaziz Ağa bin iki yüz elli senesi hilâlinde kazâ-i mezkûrda voyvoda iken mâlımdan beher arabası üçer guruş kıymetli beş yüz araba taşımı fuzûlî ve bi-gayrı hakkın ahz ve kasaba-i mezkûrede inşâ eylediği mağazası duvarlarına sarfla istihlâk etmekle ben zikr olunan beş yüz araba taşın kıymeti olan bin beş yüz guruşu yedimde olup işbu sene-i mübâreke Şa‘bâni’l-mu‘azzamı’nın yirmi ikinci günü târihiyle müverrah ve kazâ-i mezkûr nâibi mevâlî-i i‘zâmda fazîletlü es-Seyyid Mehmed İmâdüddin Efendi’nin mührünü mutâbık bir kıt‘a i‘lâm mantûkunca merkūm es-Seyyid Abdülaziz Ağa’dan inkârına mukārin da‘vâ ve ber-vech-i muharrer müdde‘âmı Kadri Bey [b.] Mustafa b. Ahmed ve Parmaksız dâmâdı Mehmed b. Halil nâm şâhideyn-i mu‘addileyn şehâdetleriyle bi’l-muvâcehe isbât etmemle mûcebince mârrü’z-zikr beş yüz araba taşın kıymeti olan meblağ-ı mezkûr bin beş yüz guruşu bana edâya mezbûr es-Seyyid Mehmed Abdülaziz Ağa’ya tenbîh olunmuş idi el-hâletü hâzihî meblağ-ı mahkûmün-bih-i mezkûr bin beş yüz guruşu merkūm es-Seyyid Mehmed Abdülaziz Ağa’dan tazmîn taleb ederim deyü da‘vâ ettikde merkūm es-Seyyid Mehmed Abdülaziz Ağa dahi cevâbında müdde‘î-i merkūmun ber-vech-i muharrer müdde‘âsını ve mazmûn-ı i‘lâm-ı mezkûru külliyen inkâr etmekle müdde‘î-i merkūm Halil ber-vech-i muharrer müdde‘âsına şâhid olmak üzere ikāme eylediği dört nefer kimesneler şehâdet-i şer‘iye edemeyip şâhid-i âhar ikāmesinden izhâr-ı acz edip tâlib-i tahlîf dahi olmadığından mûcebiyle müdde‘î-i merkūm Halil da‘vâ-yı mezkûresiyle mezbûr es-Seyyid Mehmed Abdülaziz Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 23 min-Za sene [12]57