İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 193 Hüküm no: 145 Orijinal metin no: [63-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed İzzet Ağa’nın vefat eden Midilli Nâzırı Mustafa Ağa ve oğlu İsmail Bey’de olan zeytin yağı alacağının Mustafa Ağa’nın terekesinden ödenmesi [Ma‘rûz] Sâhib-i arzuhâl es-Seyyid Mehmed İzzet Ağa b. Abdullah nâm kimesne bi’d-defa‘ât Pazartesi günleri huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûrü’l-ism olup bin iki yüz kırk sekiz senesi hilâlinde vefât eden Midilli nâzırı esbak Mustafa Ağa b. Abdullah’ın verâseti zevce-i menkûha-i metrûkesi Emine Hanım bt. İsmail ve sulbî kebîr oğulları İsmail Bey ve Mehmed Niyazi Bey’e münhasıra ba‘dehû mezbûr Mehmed Niyazi Bey dahi vefât edip verâseti vâlidesi mezbûre Emine Hanım ile sulbiye sagīre kızı ve li-ebeveyn er karındaşı mûmâ-ileyh İsmail Bey’e münhasıra ve mesele-i mîrâsları bi-hükmi’l-münâsahati’ş-şer‘iye doksan altı sehmden olup sihâm-ı mezbûreden on dokuz sehmi zevce-i mezbûre Emine Hanım’a ve elli altı sehmi mûmâ-ileyh İsmail Bey’e ve yirmi bir sehmi sagīre-i merkūmeye isâbeti tahakkukundan sonra verese-i merkūmûndan tereke-i müteveffâ-yı merkūma vaz‘-ı yedi mütehakkık olan mûmâ-ileyh İsmail Bey mahzarında Midilli cezîresinde vâki‘ her biri lede’l-ahâli ve’l-cîrân ma‘lûmü’l-hudûd on bir kıt‘a zeytin bahçeleriyle cezîre-i merkūmeye tâbi‘ Katırtozu karyesinde vâki‘ kezâlik ma‘lûmü’l-hudûd ve’l-müştemilât bir bâb revgan-ı zeyt âsiyâbı bâ-mülknâme-i hümâyûn yedimde emvâlim iken zikrleri mürûr eden zeytin bahçeleri ve âsiyâbı bin iki yüz kırk üç senesi Recebi’l-ferdi gurresinden kırk sekiz senesine gelince beş sene müddet müteveffâ-yı merkūm Mustafa Ağa ve ba‘de vefâtihî târih-i merkūmdan elli altı senesi gāyetine gelince dokuz sene müddet merkūm İsmail Bey’den her biri fuzûlî ve bi-gayrı hakkın zabt u tasarruf etmeleriyle zikrleri mürûr eden zeytin bahçeleri ve âsiyâb yedimde olup işbu sene-i mübâreke Muharremi’l-harâmının yirmi birinci günü târihiyle müverrah İstanbul Mahkemesi’nden verilen bir kıt‘a i‘lâm-ı şer‘î nâtık olduğu üzere mûmâ-ileyh İsmail Bey yedinden nez‘ ve bana mahâllinde teslîm olunmuş idi el-hâletü hâzihî zikrleri mürûr eden bahçelerin ağaçlarından ve âsiyâb-ı mezkûrun ücretinden yedimde olup diğer arzuhâl hâmişinde muharrer müteveffâ-yı merkūmun Bâb-ı âlîye takdîm eylediği inhâ kaydı nâtık olduğu üzere beş sene müddetde müteveffâ-yı merkūmun hayatında kabz ve istihlâk eylediği dört bin yedi yüz elli desti revgan-ı zeyt ve ba‘dehû beher sene bin beşer yüz destiden ber-minvâl-i muharrer dokuz sene müddetde mûmâ-ileyh İsmail Bey’in kabz ve istihlâk eylediği on üç bin beş yüz desti ki cem‘an on yedi bin yedi yüz elli desti revgan-ı zeytden zikr olunan dört bin yedi yüz elli desti revgan-ı zeytin emsâlini tereke-i müteveffâ-yı merkūmdan mûmâ-ileyh İsmail Bey’in vâzı‘ü’l-yed olduğu hisse-i vâfiyesinden ve zikri mürûr eden on üç bin beş yüz desti revgan-ı zeytin emsâlini mûmâ-ileyh İsmail Bey’den hâlâ tazmîn taleb ederim deyü da‘vâ ettikde ol dahi cevâbında zikrleri mürûr eden bahçeler ve âsiyâbı ber-vech-i muharrer beş sene müddet pederi müteveffâ-yı merkūm ve ba‘dehû dokuz sene müddet kendisi zabt ü tasarrufunu bi’l-asâle ve bi’l-verâse ikrâr ü i‘tirâf edip lâkin pederi müteveffâ-yı merkūm hayatında müddet-i merkūmede üç yüz otuz sekiz buçuk desti ve kendisi dört yüz altmış sekiz desti ki cem‘an sekiz yüz altmış altı buçuk desti revgan-ı zeyt kabz ve istihlâk olduğunu ikrâr müdde‘î-i merkūm es-Seyyid Mehmed İzzet Ağa’nın ziyâde on altı bin sekiz yüz seksen üç buçuk desti revgan-ı zeyt müdde‘âsını bi’l-asâle ve bi’l-verâse inkâr etmekle müdde‘î-i merkūm es-Seyyid Mehmed İzzet Ağa ber-minvâl-i meşrûh ziyâde on altı bin sekiz yüz seksen üç buçuk desti revgan-ı zeyt müdde‘âsını lede’l-istimhâl ve’l-imhâl her birinde müddet-i mehl-i şer‘î mürûr ve isbâtdan ızhâr-ı acz edip istihlâf ettikde mûmâ-ileyh İsmail Bey bi’l-muvâcehe ber-nehc-i şer‘î tahlîf olunmağın mûcebiyle müdde‘î-i merkūm es-Seyyid Mehmed İzzet Ağa ber-vech-i muharrer ziyâde müdde‘âsıyla mûmâ-ileyh İsmail Bey’e bilâ-beyyine mu‘ârazadan ba‘de’l-men‘ mûmâ-ileyh İsmail Bey’in ikrâr ü i‘tirâf eylediği mârrü’l-beyân sekiz yüz altmış altı buçuk desti revgan-ı zeytin üç yüz otuz sekiz buçuk destisi pederi müteveffâ-yı mûmâ-ileyhin terekesinden ve dört yüz altmış destisi mûmâ-ileyh es-Seyyid İsmail Bey’den emsâliyle damânen tahsîl ve müdde‘î-i merkūm es-Seyyid Mehmed İzzet Ağa’ya def‘ ü teslîm ettirilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 26 min-Za sene [1]257