İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 195 Hüküm no: 147 Orijinal metin no: [63-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fenelos v. Petro’nun alacak iddiasıyla Kruşni bt. Ligor’a açtığı davanın reddedildiği Mu‘ârazadan men‘ Ma‘rûz Derûn-ı arzuhâlde ismi mastûr Fenelos v. Petro nâm zimmî meclis-i şer‘-i hatîrde hâmile-i arzuhâl şahsı mu‘arrefe Kruşni bt. Ligor nâm Nasrâniye muvâcehesinde li-ebeveyn ammim olup verâseti bana münhasır olduğu hâlde mahrûse-i Galata’ya muzâfe İstinye nâhiyesine tâbi‘ Tarabya karyesi metrepolidi ve karye-i mezkûrede vâki‘ mersûme Kruşni Nasrâniyenin menzilinde mütemekkin iken bin iki yüz elli bir senesi Cumâdelûlâsı’nın gurresi günü hâlik olan Nikeforos Râhib’in terekesinden dolayı işbu meclis-i şer‘de ibrâz ve kırâet olunup [64] elli iki senesi Zilka‘detü’ş-şerîfesinin yirmi üçüncü günü târihiyle müverrah ve ol târihde Rumeli kazaskeri bulunan devletlü inâyetle Mîr Abdulkadir Efendi hazretlerinin hâtemiyle mahtûm bir kıt‘a i‘lâm-ı şer‘î nâtık olduğu üzere bedel-i sulh-ı sahîhden yirmi dört bin guruş mersûme Kruşni Nasrâniye zimmetinde mahkûmün-bih alacağım olup meblağ-ı mezkûrun ber-mantûk-ı zahr-ı i‘lâm-ı mezkûr Nasrâniye-i mesfûreden ahz u kabz etmemle bâkīsi olan on üç bin guruşu dahi mersûme Kruşni Nasrâniyeden hâlâ taleb ederim deyü ba‘de’d-da‘vâ ve’l-istintâk ol dahi cevâbında kaziyye minvâl-i meşrûh üzere olduğunu ikrâr ve tasdîk edip lâkin işbu yedimde olup elli altı senesi Cumâdelûlâsı’nın altıncı günü târihiyle müverraha ve sâbıkā İstanbul kādısı olup ba‘dehû Anadolu pâyesiyle tekrîm buyurulan sa‘âdetlü semâhatlü Mîr Mehmed Tevfik Efendi hazretlerinin imzâ ve mührünü hâviye bir kıt‘a hüccet-i şer‘iye nâtıka olduğu vechile müdde‘î-i mersûm Fenelos zimmî meblağ-ı mezkûr yirmi dört bin guruşun yirmi üç bin guruşunu zahr-ı i‘lâm-ı mezkûr mantûkunca benden ahz u kabz[ını] ikrâr ve bâkī kalan bin guruşu kendine tamamen def‘ ü teslîm ol dahi yedimden ahz u kabz edip bedel-i sulh-ı mezkûra ve târih-i hüccet-i mezkûreye gelince ammi ve mûrisi hâlik-i mersûmun kalîl ü kesîr celîl ü hakīr ism-i mâl ıtlâk olunur terekesine ve hukūk-ı mîrâsa ve sâir cemî‘i hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt etmişidik deyü mazmûnu min-külli’l-vücûh takrîrine mutâbıka hüccet-i mezkûreyi ibrâz birle müdde‘î-i mezbûrun inkârına mukārin eylediği def‘ini ve mazmûn-ı hüccet-i mezkûreyi dâfi‘a-i mesfûre Kruşni Nasrâniye Muhzırlar Kethudâsı Hafız İsmail Ağa b. Mustafa ve Muhzır İsmail Çelebi b. Mehmed nâm şâhideyn-i mu‘addileyn şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebiyle müdde‘î-i mersûm Fenelos zimmî da‘vâ-yı mezkûresiyle mersûme Kruşni Nasrâniyeye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 26 min-Za sene [12]57