İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 196 Hüküm no: 148 Orijinal metin no: [64-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Yorgi’nin dalyanına Papasoğlu Küçük Ligori, Yorgi ve diğer zimmîlerin müdahalelerinin meni Dalyan keşfi Ma‘rûz-ı dâ‘î-i Devlet-i [aliyyeleridir ki] Sâdır olan fermân-ı âlîlerine imtisâlen zikri âtî husûsun mahâllinde ketb ü tahrîr ve keşf ü tahkīki’çün savb-ı şer‘-i enverden me’zûnen irsâl olunan Kâtib es-Seyyid Mustafa [b.] Abdüllatif Efendi medîne-i Üsküdar’a muzâfe Gekvize (Gebze) nâhiyesine tâbi‘ Mu‘allim karyesi zîrinde Dil İskelesi nâm mahâlde vâki‘ zikri âtî münâza‘un-fîh dalyan mahâlline varıp huzûr-ı Müslimînde akd-i meclis-i şer‘-i nebevî ettikde nâhiye-i mezkûre kurâlarından Darıcı karyesi re‘âyâsından olup iskele-i mezkûre civârında vâki‘ Kurukavak nâm-ı diğer Enarca(?) İskelesi nâm mahâlden zikr olunan Dil İskelesi pîşgâhında Keres(?) Burnu’na ve ondan Yılancık Burnu nâm <> mahalle müntehî leb-i deryâ ile mahdûd dalyan yeri ve sayd-ı mâhî için <> İğrib Çekmek mahâlline mârrü’z-zikr Darıca karyesi mukāta‘asına mülhak senevî yedi bin beş yüz akçe bedel-i öşr-i mukāta‘a ile bâ-temessük-i tapu mutasarrıf olan sâhib-i arzuhâl Andon v. Yorgi zimmî meclis-i ma‘kūd-ı mezkûrda zikr olunan dalyan yeri berâtında hâsıl kayd olunan asâkir-i munzama-i şâhâne tımarlı süvârîlerinden Ahmed Sipâhî b. Abdullah tarafından vekîl-i şer‘îsi Mehmed Salih b. Salih nâm kimesne hâzır olduğu hâlde yine zikr olunan Darıca karyesi re‘âyâsından derûn-ı arzuhâlde isimleri mastûr altı nefer zimmîlerden Papasoğlu Küçük Ligori v. diğer Yorgi ve Pelaş Reis v. Pelaş ve Araboğlu Haralem v. Yani ve Pelitoğlu Nikolaki v. Drako ve Pelitoğlu Yorgi v. Apostol zimmîler muvâcehelerinde zikri mürûr eden dalyan yeri ve İğrib Çekmek mahâlli ber-vech-i meşrûh izn-i sipâhî ile bâ-temessük-i tapu uhde-i tasarrufumda olup ecânibden müdâhale îcâb etmez iken çend seneden berü işbu mesfûrûn Küçük Ligori ve Pelaş ve Haralam ve Nikolaki ve Yorgi zimmîlerden her biri sâlifü’l-beyân dalyan mahâllinin zikr olunan Keres(?) Burnu’ndan mârrü’l-beyân Yılancık Burnu’na varınca leb-i deryâ ile mahdûd olan sayd-ı mâhî için İğrib Dolabı? ta‘bîr olunan mahâllini tasarrufuma müdâhale ve mümâna‘at ederler suâl olunup ber-vech-i muharrer vâki‘ olan müdâhaleleri men‘ olunmak matlûbumdur deyü da‘vâ ettikde onlar dahi cevâblarında kaziyye minvâl-i meşrûh üzere olup mahâll-i mezkûrda kendilerinin aslâ ve kat‘a alâka ve medhalleri olmadığını ve müdde‘î-i mersûmun ber-minvâl-i muharrer mutasarrıf olduğu mahâll-i mezkûru tasarrufuna fuzûlî müdâhale ve mümâna‘atlarını tâyi‘an ve kat‘iyyen ikrâr ü i‘tirâf ve fîmâ-ba‘d mahâll-i mezkûra müdâhale etmemek üzere her biri müte‘ahhidler olup bu vechile kat‘-ı nizâ‘ ve ref‘-i husûmet eylediklerini kâtib-i mezbûr dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le bi’t-terâzî İstanbul Mahkemesi’nde ma‘kūd meclis-i şer‘-i şerîfe gelip mersûm Andon zimmî ile mersûm Küçük Ligori zimmî tarafından husûs-ı âtîde vekîl-i müseccel-i şer‘îsi yine zikr olunan Darıca karyesi kocabaşısı diğer Ligori v. Kostandi ve nefsinden asıl ve mesfûrûn Pelaş ve Haralem ve Nikolaki zimmîler taraflarından kezâlik husûs-ı âtîde vekîl-i müseccel-i şer‘îleri mersûm Yorgi zimmîlerden her biri hâzır oldukları hâlde tasdîklerine mukārin alâ-vukū‘ihî inhâ ve takrîr eylediği huzûr-ı [âlîlerine i‘lâm olundu] Fî 4 min-Za sene [12]57