İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 198 Hüküm no: 151 Orijinal metin no: [64-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhan tüccarından İstemat’ın, Tütüncü Niko’daki alacağının Niko’nun gediğinin satılarak elde edilen gelirden tahsil edilmesi Muktezâ i‘lâmı Ma‘rûz Sâdır olan fermân-ı âlîlerine imtisâlen duhân tüccârından sâhib-i arzuhâl İstemat v. Apostol nâm zimmînin tütüncü tâifesinden derûn-ı arzuhâlde ismi mastûr medîne-i Üsküdar’a muzâfe İstavroz’da mütemekkin Çengelköylü Niko v. Hıristo nâm zimmî zimmetinde üç senelik duhân ahz u i‘tâsından dolayı altı bin yüz on bir guruş alacağı olup ve mersûm Niko zimmînin meblağ-ı mezkûr mersûm İstemat zimmîye zimmetinde deyni olduğunu nâtık bundan akdem doksan bir gün tecîl ile esnâf-ı mezkûreye mahsûs lonca odasında mahzar-ı şühûdda bir kıt‘a tahvîle rabt olundukdan sonra eceli dokuz mâh hulûl edip medyûn-ı mersûm Niko zimmî meblağ-ı mezkûru edâdan imtinâ‘ ve ta‘annüd etmekle mersûm İstemat zimmînin dahi Duhân Gümrüğü’ne külliyetli deyni olup ve esnâf bu makūle ta‘annüdü zâhir olan medyûnun mâlik olduğu emlâk ve akārı ma‘rifet-i şer‘ ve esnâf kethudâları ma‘rifetleriyle semen-i misliyle âhara bey‘ olunup hâsıl olan esmânından evvelen deyn-i mîrîsi ve ba‘dehû duhân tüccârına olan deyni tediye ettirilmek esnâf-ı mezkûrenin hâmiş-i arzuhâlde mastûr Duhân Gümrüğü emîni sa‘âdetlü ağa bendelerinin i‘lâmı nâtık olduğu vechile fermân-ı âlîleri şurût ve nizâmından idiği müstebân oldukdan sonra mersûm Niko zimmî meclis-i şer‘-i hatîrde meblağ-ı mezkûr altı bin yüz on bir guruş mersûm İstemat zimmîye deyni olduğunu tâyi‘an ve kat‘iyyen ikrâr ü i‘tirâf etmeğin mûcebince meblağ-ı mezkûr altı bin yüz on bir guruşu mersûm Niko zimmînin edâ-yı deyne müte‘ahhid eylediği sûretde mâlik olduğu gediği ber-mûceb-i emr-i âlî ma‘rifet-i şer‘le ve kethudâları ma‘rifetiyle semen-i misilleriyle âhara bey‘ ve tediye-i deyn ettirilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-selhi Za sene 1257