İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 199 Hüküm no: 152 Orijinal metin no: [65-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Batpazarı’ndaki dükkânını kapatıp kaybolan Abacı Ahmed’in dükkânı açılarak içindeki eşyalarının satılıp parasının yed-i emine teslim edildiği Mefkūd i‘lâmı Defterinin kaydına vekāyi‘-i hüccet sicillinin kırk altıncı varakına nazar oluna Ma‘rûz İstanbul’da Batpazarı nâm mahâlde es-Seyyid el-Hâc Hüseyin Ağa’nın dükkânı ittisâlinde kâin bir bâb abacı dükkânında müşâhereten müstecir olan abacı esnâfından Ahmed nâm kimesne târih-i i‘lâmdan üç ay mukaddem dükkân-ı mezkûru mukaffelen terk ve ta‘tîl birle diyâr-ı âhara <> firâr ve <> gaybûbet edip hâli nâ-ma‘lûm olmağla dükkân-ı mezkûrun kuflünü ma‘rifet-i şer‘le feth ve küşâd ve derûnunda mevcûd mefkūd-ı merkūmun mâlı tahrîr ve mütesâri‘u’l-fesâd olan eşyâsı semen-i misilleriyle âhara bey‘ olunup semeni mefkūd-ı mezkûrun hâli mütebeyyin oluncaya değin li-ecli’l-hıfz yed-i emîne vaz‘ ve dükkân-ı mezkûru kendine teslîm olunmasını gedik mâlikesi Şerife Hatice bt. es-Seyyid Ahmed nâm hatun bâ-arzuhâl istid‘â ve sâdır fermân-ı âlîlerine imtisâlen savb-ı şer‘-i enverden irsâl olunan Kâtib es-Seyyid Mehmed Said Efendi ma‘an meb‘ûs ümenâ-i şer‘le ve husûs-ı mezkûreye mübâşir ta‘yîn olunan Dîvân-ı âlî çavuşlarından İbrahim Çavuş b. Abdullah ve abacı esnâfının kethudâsı es-Seyyid el-Hâc Hüseyin Ağa b. es-Seyyid Mustafa ve Yiğitbaşıları es-Seyyid Mehmed Nazif Ağa b. es-Seyyid Hüseyin ve Mehmed Ağa b. el-Hâc Hüseyin ve el-Hâc Hüseyin Ağa b. el-Hâc Mehmed Sadık ve sâir mazbûtü’l-esâmî Müslimîn hâzır olduğu hâlde dükkân-ı mezkûrenin kuflünü feth ve küşâd birle mefkūd-ı merkūmun hâli mütebeyyin oluncaya değin istikāmeti bi’l-ihbâr zâhir olup kıbel-i şer‘den kayyım nasb ü ta‘yîn olunan yiğitbaşı-i mezbûr es-Seyyid Mehmed Nazif Ağa ma‘rifetiyle ve ma‘rifet-i şer‘le zuhûr eden eşyâsını tahrîr ve mütesâri‘u’l-fesâd olmağla semen-i misilleriyle âhara bey‘ olunup esmânından dellâliye ve harc-ı defter ihrâc olundukdan sonra mümzâ ve mahtûm bir kıt‘a defter mûcebince sahhe’l-bâkī yedi yüz yirmi üç guruşu kayyım-ı merkūmun bi’l-emâne kabz ve bilâ-zarûreti kendi umûruna sarf ve istihlâk edip esmânı zimmetinde mefkūd-ı <> merkūma deyni olduğunu ikrâr ü i‘tirâf ve emriyle meblağ-ı mezkûr yedi yüz yirmi üç guruşu es-Seyyid el-Hâc Hüseyin Ağa b. es-Seyyid Mustafa ve el-Hâc İsmail Ağa b. es-Seyyid Ahmed Ağa nâm kimesne dahi başka başka kefîl ve zâmin <> olduklarında tashîhan li-kefâletin vasî nasb olunan Muhzır Mehmed Ağa b. Ebûbekir dahi kefâlet-i mezkûreyi kabûl eylediğini kâtib-i mezbûr mahâllinde ba‘de’l-ketb ve’l-inhâ İstanbul Mahkemesi’nden huzûr-ı âlîlerine i‘lâm olundu. Fî 8 min-Za sene [12]57