İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 200 Hüküm no: 153 Orijinal metin no: [65-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako ve ortaklarının sahibi oldukları kayıkhane ve odalara Mihal ve diğer şahısların müdahalesinin meni Kayıkhâne ve odaları beş nefer zimmîlerin zabtları Ma‘rûz Ashâb-ı arzuhâl Yako ve Mişon veledey Yasef ve kendiden asıl ve li-ebeveyn er karındaşı İlya nâm Yahûdî tarafından husûs-ı âti’l-beyânda vekîl-i müsecceli diğer Yako v. Avram ve Selmiye v. başka Yako nâm Yahûdî tarafından dahi kezâlik husûs-ı âti’z-zikrde vekîl-i müsecceli Avram v. diğer Yako nâm Yahûdîler ile şahısları mu‘arrefe Vide bt. İlya ve Saltana bt. Kemhal nâm Yahûdîyeler taraflarından dahi kezâlik husûs-ı câi’z-zikrde vekîl-i sâbitü’l-vekâleleri Hekîm Avram v. Aci Kemhal nâm Yahûdîden her biri bi’l-ma‘iye rü’yete memûr Evkāf müfettişi fazîletlü semâhatlü Mîr es-Seyyid Mehmed Emin Âsaf Efendi ma‘iyetiyle şifâhen sâdır olan fermân-ı âlîlerine imtisâlen Pazartesi günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde balıkçı tâifesinden derûn-ı arzuhâlde isimleri mastûr Mihal v. Yorgi ve Yanko v. Luka ve Ananasya ve Vasil veledey İstefani ve Yorgi v. İstemat nâm zimmîler muvâcehelerinde mahrûse-i Galata’ya muzâfe Arnavud karyesinde Dereağzı nâm mahâlde kâin bir tarafdan bizim ve müvekkillerimiz mesfûrûnun mâlikler olduklarımızı bir bâb attâr dükkânı ve ba‘zan diğer mâlikler olduklarımız bir bâb balıkçı dükkânı ve bir tarafdan leb-i deryâ ve bir tarafı sikke-i nâfize bir tarafdan tarîk-i âm ile mahdûd zahrında bir kıt‘a kayıkhâne ve üzerinde sofayı müştemil iki bâb oda ve bir bâb balıkçı dükkânı bizim ile müvekkillerimiz mesfûrûndan her birimizin bâ-hüccet-i şer‘iye bi-tarîki’l-irs yedimizde şâyi‘an mülkümüz ve ancak dükkân-ı mezkûr derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme Haremeynü’ş-şerîfeyn vakfı müstegallâtından olmak üzere yüz yirmi sehm i‘tibârıyla kırk sehmi mesfûrûndan mersûm Mihal zimmînin ve otuz beş sehmi mersûm Yanko zimmînin ve yirmi beş sehmi mersûmân Ananasya ve Vasil zimmîlerin ve yirmi sehmi mesfûr Yorgi zimmînin bi’l-icâreteyn tasarruflarında olarak mârrü’z-zikr balıkçı dükkânında mesfûrûn şehriye yirmi yedişer buçuk guruş kirâ ile müstecirlerimiz iken karye-i mezkûrda bundan akdem bi-kazâillâhi te‘âlâ vukū‘ bulan harîkde muhterik ve arsa-i sırfa kaldıkdan sonra yedimizde olup işbu sene-i mübâreke Cumâdelâhiresinin üçüncü günü târihiyle müverrah ma‘rifet-i şer‘ ve Ebniye-i Hâssa müdîri efendi hulefâsından Mehmed Salih ve Mehmed Nuri halîfeler ma‘rifetleriyle lede’l-mu‘âyene keşf ve misâha olduğunu hâviye bir kıt‘a müfredât keşfi nâtık olduğu üzere arsa-i mezkûre üzerine bi-şarti’r-rücû‘ emrimizle mesfûrûn kendi mâllarından sekiz bin otuz dokuz buçuk guruş harc u sarf ederek zikrleri mürûr eden kayıkhâne ve odaları ve dükkânı binâ ve inşâ etmişler idi el-hâletü hâzihî mutasarrıflar oldukları gediklerini dükkân-ı mezkûrda ke’l-evvel icrâya kanâ‘at etmeyip balıkhâne ve oda-i mezkûreleri dahi gediğimiz dâhilindedir deyü fuzûlî ve bi-gayrı hakkın zabt u tasarruf edip bizimle müvekkillerimiz mersûmûndan her birimizin zikrleri sebkat eden odalar ve kayıkhâneyi tasarrufumuza bî-vech mümâna‘at eder olmalarıyla suâl olunup kayıkhâne ve oda-i mezkûrlardan keff-i yedlerine mersûmûn Mihal ve Yanko ve Ananasya ve Vasil zimmîlerden her birine tenbîh olunmak bi’l-asâle ve bi’l-vekâle murâdımızdır deyü da‘vâ ettiklerinde onlar dahi cevâblarında gedik-i mezkûr ancak dükkân-ı mezkûrda mevzû‘ olduğunu ve kayıkhâne ve oda-i mezkûrlar gediklerine dâhil olmayıp kendilerinin alâkaları olmadığını her biri ikrâr ü i‘tirâf edip lâkin biz dükkân-ı mezkûru hîn-i inşâmızda asıl ve müvekkilûn-ı mesfûrûnun bi-şarti’r-rücû‘ emirleriyle kayıkhâne ve oda-i mezkûreleri dahi binâ ve inşâ eylediğimize ve zikrleri mürûr eden kayıkhâne ve odalar ve dükkân-ı mezkûra muttasıl olup lüzûmu olduğuna binâen gedik-i mezkûrumuza dâhil olmuş olmağla öyle olucak kayıkhâne ve oda-i mezkûreleri dükkân-ı mezkûr ile ma‘an tasarruf ederiz deyü tasaddî eyledikleri da‘vâları mesmû‘a ve iltifâta şâyân olmadığı mersûmûn Mihal ve Yanko ve Ananasya ve Vasil ve Yorgi zimmîlere tefhîm olunmağın mûcebince dükkân-ı mezkûr mahâllinde irâe olunduğu vechile zikrleri mürûr eden kayıkhâne ve odalardan mesfûrûn Mihal ve Yanko ve Ananasya ve Vasil ve Yorgi zimmîlerin keff-i yedi ve müdde‘ûn-ı asıl ve müvekkilûn-ı mersûmûnun zabt ü tasarrufları iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 23 min-Ş sene [12]57