İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 201 Hüküm no: 154 Orijinal metin no: [66-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaymakçı Laden ve oğlu Simon’dan alacaklarının bir bölümünü tahsil eden alacaklıların kalan alacaklarından vazgeçip zimmet ibrası yaptıkları Guramâ i‘lâmı Ma‘rûz Derûn-ı arzuhâlde isimleri mezkûr Arpacı es-Seyyid Haydar Ağa b. Mehmed ve Arpacı İsmail Ağa b. Veliyüddin ve Canbaz Mehmed Ağa b. Abdullah ve Ali Ağa b. Hasan ve Bakırcı Mehmed Ağa b. Mahmud nâm kimesneler ile Semerci Aleksan v. Mikâil ve Damço v. Esteban ve Kiro v. Niko ve Nofko v. Şebotko ve Petro v. Tanaş ve Yorgi v. Kostandi ve Sarrâf Mumcuoğlu Nikagos v. Arakil ve Trapiko v. Petro ve Oğnim v. Andon ve Abacı Yorgi v. Filip ve Abacı Kosti v. Yani nâm zimmîlerden her biri meclis-i şer‘-i münîrde kaymakçı tâifesinden arzuhâl eden Laden v. Dimitri ve sulbî kebîr oğlu Simon nâm zimmîler muvâcehelerinde merkūmûndan mezbûr es-Seyyid Haydar Ağa benim mersûmân Laden ve Simon zimmîler zimmetlerinde mâlımdan ve yedimden iştirâ ve kabz eyledikleri ma‘lûmü’l-keyl ve’l-fiyât şa‘îr semeninden alacağım olan üç bin guruşun beş yüz yirmi beş guruşunu mersûmân Laden ve Simon zimmîlerden garâmeten ahz u kabz etmemle bâkīsi olan iki bin dört yüz yetmiş beş guruş ve merkūm İsmail benim dahi mersûmân zimmetlerinde kezâlik şa‘îr semeninden alacağım olan iki bin guruşun üç yüz elli guruşunu mesfûrândan bi-tarîki’l-garâme kabz edip mâ‘adâsı olan bin altı yüz elli guruş ve mezbûr Mehmed Ağa benim dahi mersûmân zimmetlerinde semen-i mebî‘-i makbûzdan alacağım olan altı bin guruşun bin elli guruşunu kezâlik garâmeten ahz etmemle bâkīsi olan dört bin dokuz yüz elli guruş ve merkūm ( ) Ağa benim dahi mersûmân zimmetlerinde cihet-i karz-ı şer‘îden alacağım olan bin guruşun yüz yetmiş beş guruşunu kezâlik garâmeten kabz etmemle mâ‘adâsı olan sekiz yüz yirmi beş guruş ve merkūm Bakırcı Mehmed Ağa benim dahi mersûmân zimmetlerinde semen-i mebî‘-i makbû[zda]n bin üç yüz guruşun iki yüz yirmi yedi guruşunu kezâlik garâmeten ahz etmemle bâkīsi olan bin yetmiş üç guruş ve mersûm Aleksan zimmî benim dahi mesfûrân zimmetlerinde semen-i mebî‘-i makbûzdan alacağım olan dört yüz elli üç guruşun yetmiş üç guruşunu kezâlik garâmeten kabz etmemle bâkīsi olan üç yüz seksen guruş ve mersûm Damço zimmî benim dahi mesfûrân zimmetlerinde cihet-i karz-ı şer‘îden alacağım olan iki bin guruşun üç yüz elli guruşunu kezâlik garâmeten ahz etmemle bâkīsi olan bin altı yüz elli guruş ve mersûm Kiro zimmî benim dahi mersûmân zimmetlerinde cihet-i karzdan alacağım olan bin üç yüz guruşun iki yüz yirmi yedi guruşunu kezâlik garâmeten kabz etmemle bâkīsi olan bin yetmiş üç guruş ve mersûm Nofko zimmî benim dahi mersûmân zimmetlerinde yine cihet-i karzdan alacağım olan bin iki yüz guruşun iki yüz on guruşunu kezâlik garâmeten kabz edip mâ‘adâsı olan dokuz yüz doksan guruş ve mersûm Petro zimmî benim dahi mersûmân zimmetlerinde cihet-i deyn-i şer‘îden alacağım olan bin beş yüz guruşun iki yüz altmış iki guruşunu kezâlik garâmeten ahz etmemle mâ‘adâsı olan bin iki yüz otuz sekiz guruş ve mersûm Yorgi zimmî benim dahi mesfûrân zimmetlerinde cihet-i karzdan alacağım olan iki bin guruşun üç yüz elli guruşunu kezâlik garâmeten kabz etmemle bâkīsi olan bin altı yüz elli guruş ve mersûm Nikagos zimmî benim dahi cihet-i karzdan bâ-tahvîl alacağım olan on altı bin yüz seksen guruşun iki bin sekiz yüz otuz bir guruşunu kezâlik garâmeten kabz etmemle bâkīsi olan on üç bin üç yüz kırk dokuz guruş ve mersûm Trapiko zimmî benim dahi mersûmân zimmetlerinde yine cihet-i karzdan alacağım olan altı bin guruşun bin elli guruşunu kezâlik garâmeten ahz edip bâkīsi olan dört bin dokuz yüz elli guruş ve mersûm Oğnim zimmî benim dahi mersûmân zimmetlerinde cihet-i deyn-i şer‘îden alacağım olan bin guruşun bin elli guruşunu kezâlik garâmeten ahz edip mâ‘adâsı olan dört bin dokuz yüz elli <> guruş ve mersûm Abacı Yorgi zimmî benim dahi mesfûrân zimmetlerinde semen-i mebî‘-i makbûzdan alacağım olan bin beş yüz guruşun iki yüz altmış iki guruşunu kezâlik garâmeten kabz edip mâ‘adâsı olan bin iki yüz otuz sekiz guruş ve mersûm Kosti zimmî benim dahi mersûmân zimmetlerinde cihet-i karz-ı şer‘îden alacağım olan bin altı yüz guruşun iki yüz seksen guruşunu kezâlik garâmeten kabz etmemle bâkīsi olan bin üç yüz yirmi guruşdan her birimiz rızâmızla meccânen fâriğler olup bi’l-cümle husûs-ı mezkûra ve ziyâde mutâlebelerimize müte‘allika âmme-i da‘vâdan mersûmân Laden ve Simon zimmîlerin zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledik deyü ikrâr ve tasâdıkları İstanbul Mahkemesi’nden huzûr-ı [âlîlerine i‘lâm olundu] Fî 27 min-Za sene 1257