İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 203 Hüküm no: 155 Orijinal metin no: [66-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un, kocası Mustafa Bey’deki mehir ve alacağına kefil olan Mehmed Reşid Ağa’ya açtığı alacak davasında haksız bulunduğu Mu‘ârazadan men‘ [Ma‘rûz] Anadolu’da Kocaeli sancağında vâki‘ Geyve kasabası sâkinelerinden sâhibe-i arzuhâl mu‘arrefetü’z-zât Fatıma bt. Osman nâm hatun Pazartesi günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde mârrü’z-zikr Geyve Kazâsı’na tâbi‘ Bey karyesi ahâlisinden olup bâ-mektûb-ı sâmî li-ecli’t-terâfu‘ ihzâr olunan derûn-ı arzuhâlde ismi mezkûr Mehmed Reşid Ağa b. Ali nâm kimesne muvâcehesinde kasaba-i merkūme ahâlisinden olup kezâlik bâ-mektûb-ı sâmî ihzâr olunan merkūme Fatıma Hatun’un hâlâ zevci Mustafa Bey b. Ebûbekir hâzır olduğu hâlde hâzır-ı merkūm Mustafa Bey zimmetinde mehr-i mu‘accel ve cihet-i karzdan cem‘an on iki bin guruş alacağım olmağla ben meblağ-ı mecmû‘-ı mezkûru işbu târih-i i‘lâmdan altı ay mukaddem kazâ-i mezbûr nâibi sâbık Boluvîzâde es-Seyyid Mehmed Esad Efendi’nin huzûrunda zevcim hâzır-ı merkūm Mustafa Bey’den da‘vâ eylediğimde ol dahi cevâbında benim ber-vech-i muharrer müdde‘âmı ikrâr ü i‘tirâf edip lâkin meblağ-ı mecmû‘-ı mezkûr on iki bin guruşu sana tediye ve teslîm etmiş idim deyü inkârıma mukārin eylediği def‘ini zevcim hâzır-ı mezbûr isbâtdan ızhâr-ı acz ve tâlib-i tahlîf dahi olmamağla mûcebiyle zevcim merkūm def‘-i mezkûruyla bilâ-beyyine mu‘ârazadan ba‘de’l-men‘ ikrârı mûcebiyle meblağ-ı mecmû‘-ı mezkûr on iki bin guruşu bana edâya zevcim mezbûr Mustafa Bey’e tenbîh olunmağla zevcim hâzır-ı mezbûr meblağ-ı mecmû‘-ı mahkûmün-bih-i mezkûrun tahsîli’çün habsolundukdan sonra mezbûr Mehmed Reşid Ağa zevcim hâzır-ı mezbûr tarafından vekîl olarak meblağ-ı mecmû‘-ı mahkûmün-bih-i mezkûr on iki bin guruşdan benimle dört bin iki yüz elli guruş üzerine sulh olduğumda ben dahi sulh-ı mezkûru ba‘de’l-kabûl merkūm Mehmed Reşid Ağa bedel-i sulh-ı mezkûr dört bin iki yüz elli guruş bana zimmetinde kendi deyni olduğunu nâtık bin iki yüz elli altı senesi Zilka‘detü’ş-şerîfesinin yirmi ikinci günü târihiyle müverrah karz unvânıyla mu‘anven yedime bir kıt‘a temessük i‘tâ etmiş idi el-hâletü hâzihî meblağ-ı mezkûr dört bin iki yüz elli guruşu merkūm Mehmed Reşid Ağa’dan hâlâ taleb ederim deyü da‘vâ ettikde merkūm Mehmed Reşid Ağa dahi cevâbında kaziyye minvâl-i muharrer üzere olduğunu tasdîk lâkin yedimde olup işbu sene-i mübâreke Recebi’l-ferd’inin yirmi birinci günü târihiyle müverraha ve hâlâ İzmid Mahkemesi Nâibi Ahmed Şerif Efendi’nin imzâ ve mührünü hâviye bir kıt‘a hüccet-i şer‘iye nâtıka olduğu üzere merkūme Fatıma Hatun meblağ-ı mahkûmün-bih-i mezkûr on iki bin guruşu hâzır-ı mezbûr Mustafa Bey’den da‘vâ ettikde merkūm Mustafa Bey dahi cevâbında ke’l-evvel müdde‘iye-i mezbûre Fatıma Hatun’u def‘a tasaddî ve def‘-i mezkûrunu Akdoğan karyeli Ahmed b. Süleyman ve Menekşe karyeli Tâhir b. Osman nâm şâhideyn-i mu‘addileyn şehâdetleriyle bi’l-muvâcehe ber-nehc-i şer‘î isbât etmeğin mûcebiyle sulh-ı mezkûrun butlânıyla ba‘de’l-hükm müdde‘iye-i mezbûre Fatıma Hatun meblağ-ı mahkûmün-bih-i mezkûr on iki bin guruş da‘vâsıyla men‘ olunmuş idi deyü mezbûr Mustafa Bey’in tasdîkiyle eylediği def‘ini ve mazmûn-ı hüccet-i merkūmeyi müdde‘iye-i mezbûre Fatıma Hatun bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince müdde‘iye-i merkūme Fatıma Hatun da‘vâ-yı mezkûresiyle merkūm Mehmed Reşid Ağa’ya dahi bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 25 min-Za sene [12]57