İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 204 Hüküm no: 156 Orijinal metin no: [67-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaferyeli Ahmed Efendi’nin, alacaklılarına on üç ay süreyle her ay hisseleri miktarında ödeme yapmak üzere alacaklılarıyla anlaştığı Mukābele şüd [Ma‘rûz] Mübârek rikâb-ı kamer-tâb-ı hüsrevâneye takdîm-i arzuhâl eden Rumeli kuzâtı eşrâfından Karaferyeli Hafız Ahmed Efendi b. Halil meclis-i şer‘-i münîrde derûn-ı arzuhâlde mezkûr Rumeli kuzâtından <> Karaferyeli es-Seyyid Abdullah Efendi b. es-Seyyid Mehmed Efendi ve hâcegân-ı Dîvân-ı Hümâyûn’dan Yümnî Efendi b. Abdullah ve celeb gürûhundan Mehmed Yaşar Ağa b. Hüseyin ve Karaferyeli Yahya Ağa b. Ali ve Rumeli kuzâtından Ergirili İdris Efendi b. Mehmed ve Rumeli kuzâtı eşrâfından Ali Hulusi Efendi b. el-Hâc Ali ve zâtı mu‘arrefe Şerife Fatıma Hanım bt. Takiyyüddin Efendi ile poliçeci tâifesinden Bahçekapılı Avanis v. Tomas ve Kuyumcu Hüdaverdi oğulları Artin ve Kirkor veledey Agop ve sarrâf tâifesinden Yazıcıoğlu Avanis v. Bogos ve Âşinânoğlu Bogos v. Kirkor ve Poliçeci Misak <> oğlu Serkiz v. Markar nâm zimmîler muvâcehelerinde benim merkūmûndan merkūm es-Seyyid Abdullah Efendi’ye zimmetimde yedinde olup bin iki yüz kırk beş senesi Muharremi’l-harâmının on beşinci günü târihiyle müverrah imzâ ve mührümü hâvî bir kıt‘a temessük mantûkunca cihet-i karzdan beş bin yüz yetmiş beş guruş ve merkūm Yümnî Efendi’ye dahi zimmetimde yedinde olup kırk sekiz senesi <> Zilhiccetü’ş-şerîfesinin <<üçüncü günü>> gurresi târihiyle müverrah mührümü hâvî bir kıt‘a temessük mantûkunca cihet-i karzdan üç bin sekiz yüz guruş ve mezbûr Mehmed Yaşar Ağa’ya zimmetimde yedimde olup kırk yedi senesi Cumâdelâhiresinin üçüncü günü târihiyle müverrah mührümü hâvî bir kıt‘a temessük mantûkunca cihet-i karzdan on beş bin guruş ve merkūm Yahya Ağa’ya zimmetimde cihet-i karz-ı şer‘îden yedi bin beş yüz guruş ve merkūm İdris Efendi’ye zimmetimde kezâlik yedimde olup elli iki senesi şehr-i Rebî‘ülâhirinin on ikinci günü târihiyle müverrah mührümü hâvî bir kıt‘a temessük mantûkunca cihet-i karzdan üç bin beş yüz altmış guruş ve merkūm Ali Hulusi Efendi’ye zimmetimde kezâlik yedinde olup kırk beş senesi Recebi’l-ferd’inin on beşinci günü târihiyle bir kıt‘a ve elli senesi Cumâdelûlâsı’nın gurresi târihiyle müverrah mühürlerimi hâvî iki kıt‘a temessükler mantûkunca cihet-i karzdan yedi bin beş yüz altmış guruş ve merkūme Şerife Fatıma Hanım’a zimmetimde yedinde olup elli iki senesi şehr-i Rebî‘ülâhirinin yirmi üçüncü günü târihiyle müverrah bir kıt‘a i‘lâm-ı şer‘î nâtık olduğu üzere mahkûmün-bih gayrı ez-teslîm sahhe’l-bâkī otuz sekiz bin beş yüz elli guruş ve mesfûr Bahçekapılı Avanis zimmîye zimmetimde yedinde olup kırk senesi Cumâdelûlâsı’nın on beşinci günü târihiyle müverrah mührümü hâvî bir kıt‘a temessük mantûkunca karzdan bin beş yüz guruş ve mersûmân Artin ve Kirkor zimmîlere kezâlik üç kıt‘a tahvîl mantûkunca cihet-i karzdan seksen bin guruş ve mersûm Yazıcıoğlu Avanis zimmîye zimmetimde kezâlik bir kıt‘a tahvîl mûcebince cihet-i karzdan iki bin guruş ve mesfûr Bogos zimmîye zimmetimde kezâlik cihet-i karzdan yirmi beş bin iki yüz elli guruş ve mersûm Serkiz zimmîye lede’l-muhâsebe cihet-i karzdan yirmi sekiz bin <> altı yüz guruş ki min-haysü’l-mecmû‘ <> iki yüz on sekiz bin dört yüz doksan beş guruş deynim olup ve benim dahi ber-vech-i mansıb mutasarrıf olduğum Siroz Kazâsı’nın mâhiyelerinden işbu sene-i mübâreke Cumâdelûlâsı gurresinden şehr-i sâbık Şevvâli’l-mükerremi gāyetine gelince altı ay müddetde İstanbul’da Osmaniye Câmi‘-i şerîfi kurbünde vâki‘ Rub‘iye Hanı mütemekkinlerinden Sarrâf Güzeloğlu Artin zimmî indinde emrimle benimi’çün mahâllinden makbûzu olup terâküm eden yirmi üç bin sekiz yüz otuz dokuz guruş dâyinlerim beynlerinde garâmeten tevzî‘ ve taksîm olundukda meblağ-ı mezkûrdan merkūm Abdullah Efendi’nin hissesine isâbet eden beş yüz altmış dört guruş yirmi dört para ve merkūm Yümnî Efendi’nin hissesine isâbet eden dört yüz otuz dört guruş yirmi üç para ve merkūm Mehmed Yaşar Ağa’nın hissesine îcâb [eden] bin altı yüz otuz altı guruş yirmi üç para ve mezbûr Yahya Ağa’nın hissesine isâbet eden sekiz yüz on sekiz guruş on para ve mezbûr İdris Efendi’nin hissesine isâbet eden üç yüz seksen sekiz guruş on altı para ve merkūm Ali Hulusi Efendi’nin hissesine isâbet eden sekiz yüz yirmi dört guruş otuz üç para ve merkūme Şerife Fatıma Hanım’ın hissesine îcâb eden dört bin iki yüz beş guruş otuz dokuz para ve mersûm Bahçekapılı Avanis zimmînin hissesine isâbet eden yüz altmış üç guruş yirmi altı para ve mersûmân Artin ve Kirkor zimmîlerin hisselerine îcâb eden sekiz bin yedi yüz yirmi sekiz guruş on altı para ve mersûm Yazıcıoğlu Avanis zimmînin hissesine îcâb eden iki yüz on sekiz guruş <> sekiz para ve mersûm Bogos zimmînin hissesine iktizâ eden iki bin yedi yüz elli dört guruş otuz yedi para ve mersûm Serkiz zimmînin hissesine îcâb eden üç bin yüz yirmi guruş on altı parayı bu def‘a dâyinlerim merkūmûn Sarrâf Artin zimmîden bi-tarîki’l-havâle ahz u kabz etmeleriyle bâkī deynim kalan yüz doksan dört bin altı yüz elli altı guru<<şu müdde‘î-i mez>>şdan her birinin alacaklarına mahsûben kazâ-i mezbûrenin işbu târih-i i‘lâm şehri Zilka‘detü’ş-şerîfe gurresinden itibâren on üç ay müddetce beher şehr dörder bin yetmiş beş guruş yedlerine i‘tâ olunan bir kıt‘a pusula mantûkunca garâmeten beynlerinde tevzî‘ ve taksîm olunmuş olmağla ber-mûceb-i pusula-i mezkûr her biri hisselerini mâh be-mâh ahz kabz ve istifâ-yı hakka râzılar oldular deyü mukırr-ı medyûn-ı merkūm Hafız Ahmed Efendi’nin bi’l-cümle takrîr-i meşrûhunu dâyinleri merkūmûn tasdîk eyledikleri İstanbul Mahkemesi’nden huzûr-ı [âlîlerine i‘lâm olundu] Fî 22 min-Za sene 1257