İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 210 Hüküm no: 161 Orijinal metin no: [68-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Aleksan’ın Mehmed Ağa’ya olan burcunu ödemesi Mukābele şüd Ma‘rûz Harîr tüccârından sâhib-i arzuhâl Hafız Mehmed Ağa b. Hüseyin İstanbul Mahkemesi’nde meclis-i şer‘-i münîrde medîne-i İzmid’e mülhak Geyve Kazâsı’na tâbi‘ Ortaköy’den bâ-mektûb-ı sâmî-i hazret-i Vekâlet-penâhî ihzâr olunan derûn-ı arzuhâlde mastûrü’l-ism Yorgi v. Aleksan zimmî muvâcehesinde mersûm Yorgi zimmî zimmetinde mâlımdan ve yedimden iştirâ ve kabz eylediği basma ve yemeni ve çit ve çuka saltamarka semenlerinden üç bin guruş alacak hakkım olup hattâ meblağ-ı merkūm üç bin guruş cihet-i mezkûreden zimmetinde bana deyni olduğunu sene-i sâbıkā Recebi’l-müreccebinin yirmi birinci günü ikrâr ve ber-vech-i muharrer ikrârını müştemil ve târih-i merkūm ile müverrah işbu bir kıt‘a deyn tahvîlini dahi yedime verdikden sonra beş yüz guruşunu bana edâ etmekle bâkīsi olan iki bin beş yüz guruşu zimmî-i mersûmdan hâlâ taleb ederim deyü da‘vâ ettikde ol dahi cevâbında kaziyye ber-minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı bâkī-i merkūm iki bin beş yüz guruşun müdde‘î-i mezbûr Hafız Mehmed Ağa’ya edâsıyla mesfûr Yorgi zimmî ilzâm olunduğu huzûr-ı [âlîlerine i‘lâm olundu] Fî 7 min-Zilhicce sene [1]257