İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 210 Hüküm no: 162 Orijinal metin no: [68-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Ahmed Nazif Ağa’nın, Attar İsmail Efendi’den satın aldığı cariyenin hamile olduğundan satışın iptali için açtığı davada haksız bulunduğu Mukābele şüd Ma‘rûz Sâhib-i arzuhâl Yorgancı es-Seyyid Ahmed Nazif Ağa b. Ahmed İstanbul Mahkemesi’nde meclis-i şer‘-i münîrde derûn-ı arzuhâlde mezkûrü’l-ism Attâr es-Seyyid İsmail Efendi b. Hüseyin muvâcehesinde târih-i i‘lâmdan yirmi beş gün mukaddem cemî‘ uyûbdan sâlime olmak üzere mezbûr es-Seyyid İsmail Efendi’den iki bin elli guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis ma‘lûmetü’l-vasf bir res Zenciye câriyenin üç aylık hamli zuhûr edip ol-vechile mu‘ayyebe ve ayb-ı mezkûr şirâ târihinden kadîm ve inde’t-tüccâr noksân-ı semen îcâb eder uyûbdan olmağla redd-i semen ve kabz-ı mebî‘ olunmak matlûbumdur dedikde evvelen teveccüh-i husûmet bulunmak için câriye-i mezbûre kavâbile irâet olundukdan onlar dahi ba‘de’n-nazar üç aylık hamli vardır deyü haber vermeleriyle ol-vechile câriye-i mezbûrenin bâyi‘-i mezbûr yanında hamli vardır deyü teveccüh-i husûmet bulundukdan sonra da‘vâ ol dahi cevâbında câriye-i merkūmeyi ol-mikdâr guruş semen-i makbûza bey‘ini ikrâr lâkin câriye-i mezbûrenin hamli yoğidi deyü inkâr edip ve câriye-i mezbûrenin bâyi‘-i mezbûr yanında iken hamli olmadığına bi’t-taleb mezbûr es-Seyyid İsmail Efendi bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr es-Seyyid Ahmed Nazif Ağa da‘vâ-yı mezkûresiyle mezbûr es-Seyyid İsmail Efendi’ye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 3 min-Zilhicce sene [1]257