İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 212 Hüküm no: 164 Orijinal metin no: [68-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Manol’un, kendisinden alacakları olan şahıslarla borçlarını beş sene sonra ödemek üzere anlaştıkları Ma‘rûz Mübârek rikâb-ı kamer-tâb-ı mülûkâneye arzuhâl takdîm eden bakkāl tâifesinden Manol v. Paskal nâm zimmî meclis-i şer‘-i münîrde ber-vech-i âtî dâyinlerinden derûn-ı arzuhâlde isimleri mastûr Kazzâz Kosti v. Aleksi ve Çukacı Andon v. Sofyanos ve Kuyumcu Todori v. Dimitri ve Şerbetçi Vangel v. Kiryako nâm zimmîler ile şahsı mu‘arrefe Uğurice <> Nasrâniyenin babası ve tarafından husûs-ı âtîde vekîl-i sâbitü’l-vekâlesi Bakkāl Andon v. Mıgırdıç nâm zimmî muvâcehelerinde benim mersûmûndan mesfûr Kosti zimmîye cihet-i karz-ı şer‘îden bâ-temessük beş bin guruş ve mersûm Andon zimmîye kezâlik cihet-i deyn-i şer‘îden bâ-temessük altı bin guruş ve mersûm Todori zimmîye cihet-i mezkûreden bâ-temessük on dört bin guruş ve mersûm Vangel zimmîye cihet-i deyn-i şer‘îden bâ-tahvîl yedi bin guruş ve müvekkile-i mersûme Uğurice Nasrâniyeye cihet-i deyn-i şer‘îden bâ-temessük sekiz bin guruş ki cem‘an kırk bin guruş asıl ve müvekkile-i mersûmûna zimmetimde deynim olup lâkin benim düyûn-ı mezkûremi dâyinlerim asıl ve müvekkile-i mersûma hâlen ve def‘aten edâya bir vechile iktidârım olmamağla ber-vech-i âtî istimhâl eylediğimde [69] onlar dahi alacakları olan mebâliğ-i mezkûreleri işbu târih-i i‘lâmdan beş sene mürûrunda dâyinlerim mersûmûna tamamen edâ ve teslîm etmek üzere bi’l-asâle ve bi’l-vekâle rızâlarıyla beni imhâl ve tecîl eylediklerinde ben dahi kabûl ve mebâliğ-i mezkûreleri ecel-i merkūm hulûlünde dâyinlerim mersûmûna edâ ve teslîme ta‘ahhüd eyledim deyü ikrâr ve tasâdıkları İstanbul Mahkemesi’nden huzûr-ı [âlîlerine i‘lâm olundu] Fî 15 min-şehri Ramazan sene [1]257