Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 455 Hüküm no: 539 Orijinal metin no: [88b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Halil’in Ahmed b. Ramazan’la vakıf adına haksız olarak aldığı para hususunda sulh olduğu Mahmiye-i İstanbul’da Unkapanı dâhilinde Elvanzâde mahallesinde sâkin iken bundan akdem vefât eden Evliyâ Ahmed Çelebi nâm kimesnenin zevc cihetinden hasr[en] vârisesi olduğu lede’ş-şer‘ mütehakkik olan Fâtıma bt. Halil nâm hâtunun zevci ve tarafından husûs-ı âti’l-beyânı da‘vâ ve taleb ve kabza ve kendiye îsâle ve lede’l-iktizâ sulh ve ibrâya vekîl olduğu zâtını ma‘rifet-i şer‘iyye ile ârifân mahalle-i merkūme sükkânından el-Hâc Ebûbekir b. Ömer ve Hasan Beşe b. Mustafa şehâdetleri ile şer‘an sâbit olan Süleyman Çelebi b. Abdullah nâm kimesne meclis-i şer‘-i şerîf-i enverde mahmiye-i mezbûrede Harâccı Muhyiddin mahallesi mescidi şerîfi vakfına bi’l-fi‘l mütevellî olan işbu bâ‘isü’l-kitâb Ahmed Efendi b. Ramazan mahzarında ikrâr ve takrîr-i kelâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd büyût-ı adîdeyi müştemil menzilin arsası vakf-ı mezbûrdan olmağla ile’l-vefât müvekkilemin mûrisi müteveffât-ı mezbûrun izn-i mütevellî ile tasarrufunda olup ebniyesi dahi mülkü olup ba‘de vefâtihî ebniyesi müvekkileme irsen intikāl edip müteveffâ-yı mezbûr îcâr olunduğu üzre arsasiyçün ecr-i misli olan kırk akçeyi vakıf için alır iken mütevellî-i merkūm arsa-i merkūme için mezbûre Fâtıma’dan bi gayri hakkın yüz on esedî guruşunu ahz u kabz etmekle [89a] ber vech-i muharrer makbûzu olan meblağ-ı mezbûr yüz on guruşu mütevellî-i mezbûrdan bi’l-vekâle taleb ve da‘vâ eylediğimde beynimizde nizâ‘-ı küllî vukû‘undan sonra muslihûn tavassut edip mütevellî-i merkūm benim ile yirmi beş guruş üzerine sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr yirmi beş guruşu bi’l-vekâle ahz u kabz eylediğimden sonra bâkī seksen beş guruşu bi’l-vekâle vakf-ı mezbûra teberru‘ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ahmed Efendi el-Hatîb, Ahmed b. Veli, Yusuf Efendi el-İmâm, Bâli b. Mehmed, Mehmed b. İdris, Ali b. Şaban, Mehmed b. Mustafa, Yusuf Efendi el-İmâm.