Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 456 Hüküm no: 540 Orijinal metin no: [89a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Veli’nin kölesi Yusuf b. Abdullah’ı azat etmesi Medîne-i Hazret-i Ebâ Eyyûb el-Ensârî -aleyhi rahmetü’l-Bârî- mahallâtından Kasımpaşa mahallesinde sâkin câbî Mehmed Çelebi b. Veli tarafından husûs-ı âti’l-beyâna ve ikrâr[a] vekîl olup vekâleti Ahmed Çelebi b. Abdi ve Süleyman Çelebi b. Mehmed nâm kimesneler şehâdetleri şer‘an sâbite olan Müezzin Mehmed Efendi b. Mustafa meclis-i şer‘-i şerîf-i enverde ve mahfil-i dîn-i münîf-i ezherde bi’l-vekâle ikrâr-ı tâm ve takrîr-i kelâm edip müvekkilim mezbûr Mehmed Çelebi kendiye rıkkını mu‘terif olan işbu orta boylu, açık kaşlı gök ala gözlü sarı sakallı Rûsiyyü’l-asl Yusuf b. Abdullah nâm abd-i memlûkümü hasbeten lillâhi’l-meliki’l-Hallâk malımdan tahrîr ve i‘tâk ve zümre-i ahrâr-ı asliyyîne idrâc ve ilhâk eyledi ba‘de’l-yevm mevsûf-ı merkūm Yusuf ahrâr-ı asliyyîn gibi hür olup üzerinde velâ-i şer‘îden gayrı müvekkilimin hakkı bâkī kalmamışdır dedikde mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Abdüllatîf Efendi İmâm-ı Sofular, Mehmed Efendi b. Emrullah, Molla Mustafa b. Ramazan, Halil Çelebi b. ( ) İmâ[m]zâde, Hasan Beşe el-Attâr.