Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 458 Hüküm no: 543 Orijinal metin no: [89b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun’un vakıf menzildeki kullanım hakkını Ahmed Çelebi’ye devretmesi Ashâb-ı hayrâtdan üstâd Hasan Şekîbî nâm sâhibü’l-hayrın sulbiye kebîre kızı ve ber mûceb-i şart-ı vâkıf zikri âtî menzile mutasarrıf olup mahmiye-i İstanbul’da Kazasker Mehmed Efendi mahallesinde sâkine Ayşe nâm hâtun ba‘de’t-ta‘rîfi’ş-şer‘î meclis-i şerîf-i enverde yine vâkıf-ı mezbûrun oğlu Mahmud’un oğlu işbu bâ‘isü’l-kitâb Ahmed Çelebi mahzarında bi tav‘ihâ ikrâr ve takrîr-i kelâm edip müteveffâ-yı mezbûrun evvelâ kendi nefsine ba‘dehû evlâdına ve evlâd-ı evlâdına batnen ba‘de batnin ve der gāib-i asl vakf eylediği mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzilin fevkānî oda ve bir sofa ve bi’r-i mâyı ve kenîfi mezbûr Ahmed Çelebi kendi malıyla vakıf için binâ edip ve benim meskene ihtiyâcım olmayıp mezbûr Ahmed Çelebi meskene muhtâc olmağla binâ eylediği mahalde kendi sâkinler olmak üzre ben kasr-ı yed eyledim mezbûr Ahmed Çelebi mârrü’z-zikr menzilde sâkin olsun benim kat‘â nizâ‘ım yoktur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-hâdî ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İvaz Efendi b. Mehmed, Ahmed Efendi b. ( ), İbrahim Çelebi b. Ahmed, Mustafa Çelebi b. Ahmed.