Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 458 Hüküm no: 544 Orijinal metin no: [89b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Hasan’ın mülk arsasını Hacı İbrahim b. Ahmed’e sattığı Mahmiye-i İstanbul’da Çoban Çavuş mahallesinde sâkin İbrahim Çelebi b. Hasan meclis-i şer‘-i şerîf-i enverde Saray-ı atîk sultânî teberdârlarından işbu râfi‘ü’l-kitâbü’l-müstetâb el-Hâc İbrahim Bey b. Ahmed mahzarında ikrâr-ı sahîh-i şer‘-i [ve i‘tirâf-ı] sarîh-i [mer‘î] kılıp mahalle-i mezbûrda vâki‘ bir tarafdan çizmeci Ömer Çelebi menzili ve bir tarafdan birâderim Mustafa Çelebi menzili ve bir tarafdan benim menzil ve bir tarafdan merkūm el-Hâc İbrahim Bey menzili ile mahdûd tûlen on beş buçuk arzen on bi hesâb-ı terbî‘î yüz beş buçuk zirâ‘ olup bir su kuyusu ve taş duvar-ı kebîri müştemil olan mülk arsamı nukz-ı ma‘lûmu ve sâir tevâbi‘ ve levâhıkıyla ve cümle menâfi‘ ve merâfıkı ile bey‘-i bâtt-ı kat‘î ile merkūm el-Hâc İbrahim Bey’e bi safkatin vâhide dört yüz seksen bir guruş ile bir sülüs guruşa bey‘ ve temlîk ve teslîm ol dahi iştirâ ve tesellüm ve kabûl ettikden sonra semeni olan meblağ dört yüz seksen bir guruşla bir sülüs guruşu bana edâ ve teslîm ben dahi yedinden tamâmen ahz u kabz eyledim ba‘de’l-yevm arsa-i mahdûd cümle müştemilât ve nukzuyla müşterî-i merkūm el-Hâc İbrahim Bey’in mülk-i müşterâsı ve hakk-ı sırfı olmuşdur benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam sene seb‘a ve tis‘în ve elf. Şuhûdü’l-hâl: Yahya Efendi el-İmâm, el-Hâc Hüseyin Efendi b. Ahmed, Fazlı Efendi vekîl-i imâm, Mehmed Ağa b. Abdullah.