İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 267 Hüküm no: 221 Orijinal metin no: [85-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurthane gediği ile menzil ve dükkân hisselerinin satışı Yoğurthâne nizâ‘ına dair. [Ma‘rûz] Yoğurtçu esnâfından olup arzuhâl eden Leon v. Dimitri zimmî bi’l-ma‘iyye rü’yete memûr Evkāf Müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde zikri âtî vakıf yoğurthâne ve kunduracı dükkânı ve menzil ve gedik âlâtının nısf hisse-i şâyi‘alarına bâ-temessük-i mütevellî mutasarrıf ve vaz‘-ı yedi mütehakkık olan derûn-ı arzuhâlde ismi mezkûr Mehmed Râif Efendi b. Ali muvâcehesinde bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan evkāfdan cennet-mekân merhûm ve mağfiret-nişân hazret-i Sultan Bâyezid Han -aleyhi eltâfü Rabbihi’l-Mennân— hazretlerinin evkāf-ı şerîfeleri müsakkafâtından mahrûse-i Galata hâricinde Taksim civârında Şeyhü’l-harem Hüseyinağa mahallesinde Pelitcik nâm mahâlde kâin ma‘lûmü’l-hudûd bir bâb vakıf yoğurthâne ve ittisâlinde bir bâb vakıf kunduracı dükkânı ve üzerlerinde mebnî üç bâb odayı müştemil bir bâb vakıf menzil ve zikr olunan yoğurthâne derûnunda mevcûde beyne’l-esnâf gedik ta‘bîr olunur Evkāf-ı Haremeyn-i Muhteremeyn müstegallâtından âlât-ı lâzıme-i ma‘lûmenin nısf hisse-i şâyi‘aları benim ve nısf şâyi‘a-i âharları dahi işbu hâzır bi’l-meclis Taşçı Tarabko v. Anaştaş zimmînin bâ-temessük-i kāimmakām-ı mütevellî bi’l-icâreteyn taht-ı tasarrufumuzda iken ben mecmû‘ yoğurthâne ve dükkân ve menzil ve âlât-ı gedik-i merkūmlardan ber-vech-i muharrer mutasarrıf olduğum nısf hisse-i şâyi‘a-i mezkûreyi sene-i sâbıkā Şevvâli’l-mükerreminin yirmi beşinci günü hüsn-i rızâ ve tayyib-i hâtırım ve ferâğ-ı mu‘teber-i kat‘î ile on beş bin iki yüz guruş bedel-i makbûz mukābelesinde mezbûr Mehmed Râif Efendi’ye bâ-re’y-i kāimmakām-ı mütevellî <> ferâğ ve tefvîz etmiş iken dükkân ve menzil-i mezkûrların nısf hisse-i şâyi‘alarını ferâğ etmemiş idim deyü mezbûr Mehmed Râif Efendi’den da‘vâya tasaddî etmiş idim el-hâletü hâzihî mezbûr Mehmed Râif Efendi rızâsıyla mâlından teberru‘an bana sekiz yüz guruş def‘ ü teslîm ben dahi yedinden ahz u kabz edip bi’l-cümle husûs-ı mezkûra ve ferâğ-ı mezkûrlara müte‘allika da‘vâdan tarafeynden her birimiz âharın zimmetini kabûlümüzü hâvî ibrâ-i sahîh-i şer‘î ile ibrâ ve iskāt edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 4 S sene [12]58