İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 268 Hüküm no: 222 Orijinal metin no: [85-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safo. bt. Petro ile Petro v. Yani arasındaki yoğurthane ve tarla satışından meydana gelen ihtilafın giderildiği Yoğurthâne ve bostan nizâ‘ına dâir [Ma‘rûz] Derûn-ı arzuhâlde ismi mastûr şahsı mu‘arrefe Safo bt. Petro Nasrâniye Hudâvendigâr-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı ilâhî Sultan Mahmud Han -aleyhi eltâfü Rabbihi’l-Mennân- hazretlerinin evkāf-ı celîleleri kāimmakām-ı mütevellîsi ecille-i ricâl-i Devlet-i aliyyeden hâlâ Evkāf nâzırı atûfetlü semâhatlü Numan Mahir Beyefendi taraflarından mürsel vekîlleri Abdulkadir Efendi b. Mahmud hâzır olduğu hâlde bi’l-ma‘iyye rü’yete memûr Evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde yoğurtcu esnâfından olup zikri âtî vakıf gedik âlâtlarının rub‘ hisse-i şâyi‘alarına vaz‘-ı yedi mütehakkık olan arzuhâl sâhibi Petro v. Yano zimmî muvâcehesinde İstanbul’da Şeyh Ebulvefâ Câmi‘-i şerîfi civârında ve Voynuk Şücâeddin mahallesinde çeşme karşısında vâki‘ mersûm Petro zimmî ile taht-ı icâremizde olan bir bâb yoğurtcu kârhânesi ve zahrında vâki‘ bir bâb bostan derûnlarında mevcûde beyne’l-esnâf gedik ta‘bîr olunur evkāf-ı celîle-i mezkûre müstegallâtından âlât-ı lâzıme-i ma‘lûmelerin nısf hisse-i şâyi‘aları benim ve nısf hisse-i şâyi‘a-i âharları dahi mersûm Petro zimmînin bâ-temessük-i mütevellî bi’l-icâreteyn taht-ı tasarrufumuzda iken bin iki yüz kırk dokuz senesi şehri Rebî‘ülâhirinin on dördüncü günü vukū‘ bulan Tüfenkhâne-i âmire harîkinde kârhâne-i mezkûr ile ebniye-i bostan-ı mezkûr muhterik olduklarında derûnlarından müstahlas ber-vech-i muharrer mutasarrıf olduğumuz âlât-ı lâzıme-i ma‘lûmelerin rub‘ hisse-i şâyi‘alarını uhdemde ibkā edip mâ‘adâ rub‘ hisse-i şâyi‘alarını sene-i merkūme Şa‘bâni’l-mu‘azzamı’nın on dokuzuncu günü mersûm Petro zimmîye izn-i mütevellî ile ferâğ eder olduğumda mâlından bana bin guruş bedel vermek ve bostan-ı mezkûr ebniyesiyle kârhâne-i mezkûru benden nesne mutâlebe etmeyerek kendi mâlıyla benim hissemde teberru‘an binâ ve inşâ ve âlât-ı merkūmelerin ta‘mîre muhtâc olanlarını dahi kezâlik kendi mâlıyla benim hissemde teberru‘an ta‘mîr ve termîm ve ba‘dehû kârhâne ve bostan-ı mezkûrlar derûnlarına vaz‘ ve benimle zabt u tasarruf etmek şartıyla mersûm Petro zimmîye ferâğ ve tefvîz eylediğimde ol dahi ber-vech-i muharrer tefevvüz ve kabûl ve bedel-i mezkûr bin guruşu bana def‘ ü teslîm ben dahi yedinden ahz u kabz edip ba‘dehû mersûm Petro zimmî kârhâne-i mezkûr ile ebniye-i bostan-ı mezkûru kendi mâlıyla binâ ve inşâ ve âlât-ı lâzıme-i ma‘lûmelerin ta‘mîre muhtâc olanlarını dahi kendi mâlıyla ta‘mîr ve termîm ve kârhâne ve bostan-ı merkūmlara vaz‘ ile rub‘ hisse-i şâyi‘a-i âlât-ı lâzıme-i merkūmeler taht-ı tasarrufunda ise de lâkin ber-minvâl-i muharrer şartla olan ferâğ-ı mezkûr mu‘teber olmamağla suâl olunup bana medfû‘u olan meblağ-ı mezkûr bin guruşu yedimden geri ahz birle rub‘ hisse-i şâyi‘a-i mezkûreden bâ-re’y-i mütevellî keff-i yedine tenbîh olunmak matlûbumdur deyü da‘vâ ettikde mersûm Petro zimmî dahi cevâbında müdde‘î-i mersûme Safo Nasrâniye rub‘ hisse-i şâyi‘a-i merkūmeyi târih-i merkūmda meblağ-ı merkūm bin guruş makbûz mukābelesinde bana bâ-re’y-i mütevellî ferâğ ve tefvîz etmekle vaz‘-ı yed ederim deyip şart-ı mezkûreyi ba‘de’l-inkâr müdde‘iye-i mersûme Safo Nasrâniye ber-vech-i muharrer müdde‘âsını her biri mahallerinden lede’t-tezkiye adl ve makbûlü’ş-şehâde idikleri ihbâr olunan bahçevân esnâfı yarıcısı [86] es-Seyyid Abdulkadir Efendi b. es-Seyyid Mehmed ve Yiğitbaşısı Mehmed Ağa b. Abdullah nâm kimesneler şehâdetleriyle huzûr-ı hazret-i müşârün-ileyhde bi’l-muvâcehe vech-i vecîh-i şer‘î üzere isbât etmeğin mûcebiyle meblağ-ı merkūm bin guruşu müdde‘iye-i mersûme Safo Nasrâniyeden geri ahz ile rub‘ hisse-i şâyi‘a-i âlât-ı mezkûrelerden mersûm Petro zimmî keff-i yed edip müdde‘iye-i mersûme Safo Nasrâniye bâ-re’y-i mütevellî zabt ü tasarrufu iktizâ <> ve zimmî-i mersûmun minvâl-i muharrer üzere masrûfunun nısfını dahi vermeğe rızâsıyla ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu] Fî 4 S sene [1]258