İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 270 Hüküm no: 223 Orijinal metin no: [86-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Ağa’nın Mehmed Ağa’ya olan borcunu ödemesi 4000 [guru]şa sulh [Ma‘rûz] Sâhib-i arzuhâl Zahîreci Mehmed Ağa b. Ali Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde hâlâ Edirne Müşîri devletlü Mehmed Said Paşa hazretleri mukaddemâ asâkir-i muntazama-i şâhâne Seraskeri oldukları hengâmda kapıcılar kethudâları olan Enderûn-ı hümâyûndan muhrec derûn-ı arzuhâlde mezkûrü’l-ism İbrahim Edhem Ağa b. Süleyman muvâcehesinde bin iki yüz elli altı senesi hilâlinde Vidinli el-Hâc Mehmed Ağa zevcesi gāibetü ani’l-meclis Âişe Hatun’a bir husûsun tanzîmi’çün mâlından rüşvet tarîkıyla mezbûr İbrahim Edhem Ağa’ya verdiği bir re’s zenciye câriyeyi mezbûr İbrahim Edhem Ağa bana iki bin beş yüz guruşa bey‘ ü teslîm ve kabz-ı semen ve ba‘dehû bi’t-terâzî bey‘-i mezkûru fesh ü ikāle birle mebî‘-i mezkûru geri yedimden ahz ve gāibe-i mezbûreye redd ü teslîm etmekle makbûzu olan semen-i merkūm iki bin beş yüz guruşu bi-şarti’r-rücû‘ emriyle mâlımdan bacanahım [bacanağım] Şileli Süleyman’a medfû‘um olan iki bin beş yüz guruş ve beynimizde ma‘lûm bir husûsun temşiyyeti’çün mâlımdan bi-tarîki’r-rüşve mezbûr İbrahim Edhem Ağa’ya verdiğim bin iki yüz guruş ve beher şehr yüz ellişer guruş ücret tesmiyesiyle bin iki yüz elli beş senesi şehri Ramazani’l-mübâreki gurresinden sene-i sâbıkā Şa‘bâni’l-mu‘azzamının gāyetine gelince iki sene müddet kendine hizmet etmemle ecr-i müsemmâmdan müddet-i mezkûrede iktizâ eden üç bin altı yüz guruş ve bi-şarti’r-rücû‘ emriyle bâ-defter-i müfredât umûr-ı ma‘lûmesine mâlımdan masrûfum olan iki bin iki yüz otuz bir guruş ki cem‘an on iki bin otuz bir guruşu mezbûr İbrahim Edhem Ağa’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr ile kat‘an-li’n-nizâ‘ dört bin guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i <> de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr dört bin guruşu müdde‘î-i mezbûr Mehmed Ağa’ya bi’t-taleb edâ ve <> teslîme mezbûr İbrahim Edhem Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 4 S sene [1]258