İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 271 Hüküm no: 224 Orijinal metin no: [86-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Manuk v. Varito’nun satın aldığı emlak ve araziye yapılan müdahelenin men olunması Arâzi nizâ‘ına dâir [Ma‘rûz] Anadolu’da medîne-i Karahisar-ı şarkī nevâhîsinden Akşarâbâd [Akşehirâbâd] nâhiyesine tâbi‘ Kirtanos? karyesi ahâlisinden derûn-ı arzuhâlde ismi mezkûr es-Seyyid Halil b. Selim şifâhen sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde karye-i mezkûre re‘âyâsından olup zikri âtî arâzi ve üç sehm hisse-i şâyi‘a-i emlâke vaz‘-ı yedi mütehakkık olan arzuhâl sâhibi Ekmekçi Manuk v. Varito zimmî muvâcehesinde her biri ma‘lûmü’l-hudûd ve’l-mikdâr olup karye-i mezkûrede vâki‘ bir bâb mülk menzil ve bir bâb mülk menzil arsası ve iki kıt‘a mülk bahçe sekiz sehm i‘tibârıyla üç sehm hisse-i şâyi‘aları benim ve dört sehm hisse-i şâyi‘aları mersûm Manuk zimmînin ve bir sehm hisse-i şâyi‘aları dahi gāibetü ani’l-beled Aksabet Nasrâniyenin yedimizde mülk ve hakkımız ve karye-i mezkûre hudûdu dâhilinde mevâzi‘-i adîde-i ma‘lûmede kâin beş kıt‘a tarla dahi bâ-temessük-i sâhib-i arz müstakıllen benim taht-ı tasarrufumda iken hâlâ karye-i mezkûrede sâkin babam mezbûr Selim b. Mustafa b. Abdullah bin iki yüz elli beş senesi Cemâziyelevvel’inin on beşinci günü emlâk-i mezkûreden mâlik olduğum üç sehm hisse-i şâyi‘a-i merkūmeyi safka-i vâhide ile benim iznimsiz fuzûlî mersûm Manuk zimmîye sekiz yüz doksan guruş semen-i makbûza bey‘ ü teslîm ve mutasarrıf olduğum sâlifü’l-beyân beş kıt‘a tarlayı dahi kezâlik fuzûlî zimmî-i mersûma iki bin guruş bedel-i makbûz mukābelesinde bâ-re’y-i sâhib-i arz ferâğ ve tefvîz etmekle mersûm Manuk zimmî târih-i merkūmdan beri üç sehm hisse-i şâyi‘a-i emlâk-i mezkûre ile arâzi-i merkūmeye vaz‘-ı yed eder lâkin ben babam gāib-i mezbûrun bey‘ ü ferâğ-ı mezkûrlarını mücîz olmamamla suâl olunup üç sehm hisse-i şâyi‘a-i merkūme ile arâzi-i mezkûreden keff-i yed birle bana teslîm etmek üzere mersûm Manuk zimmîye tenbîh olunmak matlûbumdur deyü da‘vâ ettikde ol dahi cevâbında müdde‘î-i mezbûr es-Seyyid Halil ber-vech-i muharrer mâlik olduğu üç sehm hisse-i şâyi‘a-i emlâk-i mezkûreyi bey‘e ve mutasarrıf olduğu arâzi-i mezkûreyi dahi bâ-ma‘rifet-i sâhib-i arz ferâğa tarafımdan babası gāib-i mezbûr Selim b. Mustafa b. Abdullah’ı mukaddemâ tevkîl edip ol dahi ba‘de-kabûli’l-vekâleti târih-i merkūmda üç sehm hisse-i şâyi‘a-i merkūmeyi bi-safkatin vâhidetin bana semen-i misilleri olan meblağ-ı merkūm sekiz yüz doksan guruş semen-i makbûza bi’l-vekâle bey‘ ü temlik ve teslîm ve arâzi-i merkūmeyi dahi bedel-i misilleri olan meblağ-ı mezkûr iki bin guruş bedel-i makbûz mukābelesinde bi’l-vekâle bana bâ-re’y-i [sâhib-i] arz ferâğ ve tefvîz ve ben dahi minvâl-i muharrer üzere iştirâ ve temellük ve tesellüm ve tefevvüz ve kabûl edip hattâ müdde‘î-i mezbûr es-Seyyid Halil sene-i mezkûre şehri Rebî‘ülâhiri gurresinde medîne-i Üsküdar’da Ayazma İskelesi’nde vâki‘ kahve dükkânında babası gāib-i mezbûr Selim’i ber-vech-i muharrer tevkîl eylediğini huzûr-ı Müslimînde ikrâr dahi etmekle üç sehm hisse-i şâyi‘a-i mezkûre ile arâzi-i merkūmeye ol-vechile bi-hakkın vaz‘-ı yed ederim deyü inkârına mukārin eylediği def‘ini her biri mahallerinden lede’t-tezkiye adl ve makbûlü’ş-şehâde idikleri ihbâr olunan nâhiye-i mezkûreye muzâfe Ortakarye ahâlisinden ve mahrûse-i Galata’ya tâbi‘ Ortaköy kayıkçılarından Selimoğlu es-Seyyid Mustafa b. es-Seyyid İsmail ve medîne-i Karahisar-ı şarkī ahâlisinden ve yine zikr olunan Ortaköy kayıkçılarından es-Seyyid Yahya b. es-Seyyid Ahmed nâm kimesne[ler] şehâdetleriyle huzûr-ı hazret-i müşârün-ileyhde bi’l-muvâcehe ber-nehc-i şer‘î isbât etmeğin mûcebince müdde‘î-i mezbûr es-Seyyid Halil da‘vâ-yı mezkûresiyle mesfûr Manuk zimmîye bî-vech-i şer‘î mu‘ârazadan ba‘de’l-men‘ üç sehm hisse-i şâyi‘a-i emlâk-i mezkûre ile arâzi-i merkūmeyi kemâ-fi’s-sâbık zimmî-i mersûmun zabt ü tasarrufu iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 4 S sene [1]258